بۋرابايدا تۋريستەر قاۋىپسىزدىگىن جاساندى ينتەللەكت كۇزەتەدى
بۋراباي. KAZINFORM - جىل باسىنان بەرى بۋراباي كۋرورتتىق ايماعىنا ميلليوننان استام تۋريست كەلگەن. اۋماقتىڭ قاۋىپسىزدىگىن كۇشەيتۋ ءۇشىن جەرگىلىكتى پوليسەيلەر جاساندى ينتەللەكتپەن بىرلەسە جۇمىس ىستەۋدى باستادى.
جاڭا جۇيە تولىعىمەن وتاندىق ءونىم جانە باس پروكۋراتۋرا مەن ىشكى ىستەر مينيسترلىگىنىڭ دەرەكتەر بازاسىمەن بىرىكتىرىلگەن. رەسپۋبليكا بويىنشا وعان الماتى، اتىراۋ وبلىستارى مەن بۋراباي اۋدانى عانا قوسىلعان.
بۋراباي اۋدانىنىڭ اكىمى اراي سادىقوۆتىڭ ايتۋىنشا، اۋداندا 79 جاڭا كامەرا TargetAI ينتەللەكتۋالدى باعدارلاماسىمەن ينتەگراتسيالاندى. بۇل قۇرىلعىلاردا ادامنىڭ بەت- ءجۇزىن تانۋ، كولىكتەردى ىزدەۋ جانە مەملەكەتتىك ءنومىر بويىنشا باقىلاۋ مۇمكىندىگى ىسكە قوسىلعان. ءتىپتى كولىكتىڭ ءجۇرىپ وتكەن مارشرۋتىن جيناقتاپ بەرە الادى.
- ەگەر تۋريست نەمەسە كىشكەنتاي بالا جوعالىپ كەتسە، ونىڭ سيپاتتاماسىن تولىق ەنگىزۋگە بولادى. قىزىل جەيدە، قارا شالبار كيگەن، 6-7 جاسار بالانى تابۋ تۋرالى كوماندا بەرىلسە، جاساندى ينتەللەكت سول سيپاتتاماعا ساي كەلەتىن ادامداردى كورسەتەدى. جاساندى ينتەللەكت ادامدى قاي جەردە جۇرگەنىن، قاي كولىكپەن جۇرگەنىن تولىق تابۋعا كومەكتەسەدى: مەملەكەتتىك ءنومىردى ەنگىزىپ، كولىكتىڭ قالا ىشىندە قاي باعىتپەن كەتكەنىن نەمەسە قالادان شىققانىن انىقتاي الامىز، - دەدى اۋدان اكىمى تىلشىلەرگە بەرگەن سۇحباتىندا.
سونىمەن بىرگە، اقىلدى جۇيە ىشكى ىستەر مينيسترلىگىندە پروباتسيالىق باقىلاۋ مەن ەسەپتە تۇرعان، ىزدەۋ جاريالانعان ادامداردىڭ، زاڭسىز ميگرانتتاردىڭ بەت-ءجۇزىن تانيدى. ولار اۋدان اۋماعىنا كىرسە، پوليسيا ءبولىمىنىڭ قىزمەتكەرلەرى مۇنى ءبىرىنشى بولىپ بىلەدى. ولار مەكتەپتىڭ قاسىنان وتسە، ادام كوپ جينالاتىن ورىندارعا بارسا، جۇيە بەلگى بەرىپ وتىرادى.
- بيىل مەملەكەت باسشىسى سۋپەركومپيۋتەردى ىسكە قوستى جانە ءبىرىڭعاي ۇلتتىق بەينەباقىلاۋ جۇيەسى ازىرلەنۋدە. بۋراباي اۋدانىنىڭ جۇيەسى وسى ينتەگراتسياعا دايىن. جاساندى ينتەللەكت جۇيەسى ىسكە قوسىلعالى 1200 دەن استام اكىمشىلىك قۇقىقبۇزۋشىلىق انىقتالدى. قازىر ءبىز جۇيەگە ءتۇتىن انىقتاۋ فۋنكتسياسىن دا قوسىپ جاتىرمىز. بىزدە 63 ەسە ۇلكەيتەتىن ەكى ۇلكەن كامەرا بار. قالادا ءتۇتىن پايدا بولسا، توتەنشە جاعدايلار دەپارتامەنتىمەن بىرلەسىپ، جەدەل ارەكەت ەتە الامىز، - دەيدى اۋدان اكىمىنىڭ ورىنباسارى مەرەي رامازان ۇلى.
جۇيە فۋنكتسيالارى ءالى جەتىلدىرىلىپ كەلەدى. مىسالى، اكىمدىك قانشا كولىك كىرگەنىن انىقتاۋ فۋنكسيونالىن قوسىپ، تۋريستەر اعىنىن سارالاپ، قاي وڭىردەن قانداي كونتينگەنت كەلەتىنىن انىقتاۋدى كوزدەپ وتىر.
تۇرعىندار رۇقسات ەتىلمەگەن جەردە قوقىس تاستاسا، بۇل ايماق انىقتالىپ، دابىل قاعىلادى. الايدا، مۇنداي باقىلاۋ ءۇشىن كامەرا سانىن كوبەيتۋ قاجەت.
- قازىر بىزدە 79 جاڭا جانە 191 بۇرىنعى كامەرا بار. اسىرەسە حالىق كوپ جۇرەتىن جەرلەر كامەرامەن قامتىلعان. ءبىز جۇيەنى كەڭەيتەمىز جانە الداعى ەكى ايدا تاعى 50 كامەرانى قوسىمشا ورناتامىز. اۋداندىق پوليتسيا، ۇ ق ك، پروكۋراتۋرا قىزمەتكەرلەرىنەن قۇرالعان ارنايى كوميسسيا كامەرا ورناتىلماعان ورىنداردى انىقتاپ، جۇيە جۇمىسىن جاقسارتادى، - دەيدى اكىمدىك وكىلى.
ايتا كەتەيىك، مەملەكەت باسشىسى بيىلعى جولداۋىندا جاساندى ينتەللەكتتى بارلىق سالالارعا ەنگىزۋ باستاماسىن كوتەردى.
ايجان سەرىكجان قىزى
