بۋرابايدا شەتەلدە تۇراتىن قازاق بالالارىنا ارنالعان ەتنولاگەر اشىلدى

بۋراباي. KAZINFORM - بۋرابايدا شەتەلدەگى قازاق بالالارىنا ارنالعان جازعى لاگەر اشىلدى. مۇندا قازاق ءتىلى، تاريحى، ۇلتتىق ويىندار ۇيرەتىلەدى. Jas Qazaq لاگەرىن «وتانداستار» قورى ۇيىمداستىرىپ وتىر.

بيىل بۇل لاگەردە ا ق ش، تۇركيا، پولشا، رەسەي، موڭعوليا، وزبەكستان، قىرعىزستان جانە قىتايدان كەلگەن ەتنيكالىق قازاق بالالارى دەمالادى. ولاردىڭ ءبارى قور ۇيىمداستىرعان ءتۇرلى بايقاۋلاردىڭ جەڭىمپازى.

- بۇل «وتانداستار» قورىنداعى ەرەكشە جوبالاردىڭ ءبىرى. Jas Qazaq ەتنولاگەرى بيىل 5-رەت وتكىزىلىپ جاتىر. مۇندا بالالار دەمالىپ قانا قويمايدى. بۇل شەتەلدەگى قازاق بالالارى تاريحي وتانىنا كەلىپ، رۋحاني مادەنيەتىن جۇرەكپەن سەزەتىن الىپ ساپارلاردىڭ ءبىرى. بالالار قازاق ءتىلىن، تاريحىن، ادەبيەتىن، سالت-ءداستۇرىن تەرەڭىرەك وقىپ، تانىسادى، - دەيدى Jibek Joly تەلەارناسىنىڭ «بۇگىن LIVE» باعدارلاماسىنا ونلاين سۇحبات بەرگەن «وتانداستار» قورىنىڭ ۆيتسە-پرەزيدەنتى الىبەك جۇرقادام.

ۇيىمداستىرۋشىلار بولاشاقتا جوبانى بۇدان دا اۋقىمدى ەتىپ وتكىزۋدى جوسپارلاپ وتىر.

- بۇعان دەيىن شامامەن 700 دەن اسا بالا قاتىستى. ال بۇگىن 130 بالا قاتىسىپ وتىر. مۇندا الەمنىڭ 9 ەلىنەن ەتنيكالىق قازاق بالالارى كەلدى. لاگەر 7-شىلدە كۇنى باستالىپ، 20-شىلدەگە دەيىن جالعاسادى. وسى ارالىقتا بالالارعا دومبىرادان ساباقتار وتكىزىلەدى، ءتۇرلى بايقاۋلار ۇيىمداستىرىلادى. بۇل ءىس-شارانى جىل سايىن ۇيىمداستىرۋدى جوسپارلاپ وتىرمىز. الداعى ۋاقىتتا بالالاردىڭ سانىن ارتتىرعىمىز كەلەدى. قوسىمشا قارجىلاندىراتىن بولسا، جوبانى ۇلكەيتۋ ماقساتىمىز بار. ويتكەنى بۇل وتە قاجەتتى شارا، - دەيدى قوردىڭ ۆيتسە-پرەزيدەنتى.

ايتا كەتەيىك، بىرنەشە كۇن بۇرىن تولەبي اۋدانىندا بالالاردى جازعى ساۋىقتىرۋعا ارنالعان مودۋلدى لاگەر اشىلعان ەدى.