«بۋراباي» ۇلتتىق پاركىندە جابايى جانۋارلاردىڭ 15 تەن استام ءتۇرى مەكەندەيدى
بۋراباي. KAZINFORM - بۇگىن «بۋراباي» مەملەكەتتىك ۇلتتىق تابيعي پاركىنىڭ قۇرىلعانىنا 24 جىل تولىپ وتىر.
شيرەك عاسىرعا جۋىق ۋاقىت ىشىندە ۇلتتىق پارك ءوڭىردىڭ اسەم تابيعاتىن ساقتاۋ مەن قالپىنا كەلتىرۋدە اۋىز تولتىرىپ ايتارلىقتاي ناتيجەگە قول جەتكىزدى. ۇلتتىق پارك اۋماعى 83510 گەكتاردان %55 عا ۇلعايىپ، قازىرگى تاڭدا 129484,88 گەكتارعا جەتتى.
سونىڭ ارقاسىندا 15 تەن استام جابايى جانۋار تۇرلەرى مەكەندەيتىن بىرەگەي ەكوجۇيەسى بار ولكە قانات جايىپ، اڭداردىڭ سانى 5 ەسەدەن ارتىق كوبەيدى. ايتالىق، اسكانيا بۇعىسى، ءسىبىر ەلىگى، قابان جانە باسقا دا سۇتقورەكتىلەردىڭ 15 تەن استام ءتۇرى ەسەلەپ ارتتى. بۇل اڭ-قۇستاردىڭ تىرشىلىگى مەن كوبەيۋىنە قولايلى جاعداي جاسالعانىن كورسەتەدى.
ۇلتتىق پارك ۇجىمى جۇمىسىنىڭ تاعى ءبىر ماڭىزدى كورسەتكىشى: 24 -جىلدا جالپى اۋدانى 1400 گەكتار جەرگە 10 ميلليوننان استام قاراعاي مەن قايىڭ كوشەتى ەگىلدى. قالپىنا كەلتىرۋ جۇمىستارىنىڭ ارقاسىندا ورمان القابى %6,2 عا ۇلعايدى.
اسەم تابيعات پەن ونىڭ بيوالۋاندىعىن ساقتاۋ ءۇشىن 2020 -جىلى ۇلتتىق پاركتە ءورتتى ەرتە انىقتايتىن «Smart Burabayc» جۇيەسى ىسكە قوسىلدى. ەلىمىزدە العاش رەت قولعا الىنعان «اقىلدى» يننوۆاتسيالىق تەحنولوگيا ءتىلسىز جاۋعا تويتارىس بەرۋ جەدەلدىگىن ەداۋىر ارتتىردى. ءسويتىپ، ءورت شالعان جەردىڭ كولەمىن ونداعان ەسە ازايتۋعا مۇمكىندىك تۋدى.
ال 2015 -جىلى «بۋراباي» ۇلتتىق تابيعي پاركى قازاقستانداعى ۇلتتىق پاركتەر اراسىندا ۇزدىك دەپ تانىلدى. وسىلايشا، ىرگەلى ۇجىمنىڭ تابيعاتتى قورعاۋ جانە ەكوتۋريزمدى دامىتۋ سالاسىنداعى جۇمىسى مەن جەتىستىكتەرى لايىقتى باعاسىن الدى.
2022 -جىلى «بۋراباي» مۇتپ يۋنەسكو قامقورلىعىنا الىنعان بيوسفەرالىق رەزەرۆاتتار جەلىسىنە قوسىلدى. بۇل مارتەبە ساياباقتىڭ بىرەگەيلىگىن جانە ونىڭ جاھاندىق قورعاۋعا الىنعان تابيعي اۋماقتار ىشىندە ەرەكشە ماڭىزعا يە ەكەندىگىن كورسەتەدى. يۋنەسكو دەڭگەيىندە تانىلۋ تابيعاتتى قورعاۋ جانە تۇراقتى دامۋ سالاسىنداعى حالىقارالىق ىنتىماقتاستىق پەن تاجىريبە الماسۋ كوكجيەگىن كەڭەيتە ءتۇستى.
«بۋراباي» م ۇ ت پ- نىڭ 25 -جىلدا اتقارعان قىزمەتى - بولاشاق ۇرپاقتىڭ يگىلىگى ءۇشىن اسەم تابيعاتقا قامقورلىق جاساۋدىڭ، ەكوتۋرزمدى دامىتۋدىڭ، جان- جانۋارلار مەن وسىمدىكتەر الەمىن ساقتاۋعا دەگەن ۇمتىلىستىڭ جارقىن ۇلگىسى. ۇلتتىق پارك ۇجىمىنىڭ وسىناۋ اتاۋلى كۇندە وزىنە جانە بارشا قازاقستاندىقتارعا جاساعان ەڭ ۇلكەن سىيى وسى ەكەنى ءسوزسىز.
