بۋراباي ەلدىڭ جەتەكشى تۋريستىك كلاستەرى رەتىندە قالاي داميدى
بۋراباي. KAZINFORM - بۇگىن بۋراباي اۋدانىندا وتكەن كەڭەستە شۋچە- بۋراباي كۋرورت يايماعىن دامىتۋدىڭ وزەكتى ماسەلەلەرى قارالدى.
ءىس-شاراعا وبلىس اكىمى مارات احمەتجانوۆ، ق ر پرەزيدەنتى ءىس باسقارماسىنىڭ وكىلى، باس پروكۋروردىڭ ورىنباسارى جانە مۇددەلى ۆەدومستۆولار - تۋريزم جانە سپورت، كولىك، ەكولوگيا جانە تابيعي رەسۋرستار، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرىنىڭ وكىلدەرى قاتىستى.
وندا باستى نازار - ينجەنەرلىك- قۇرىلىس جوبالارىن اياقتاۋ جانە كۋرورتتىق ايماقتى دامىتۋدىڭ كەشەندى جوسپارىن ازىرلەۋ ماسەلەسىنە اۋدارىلدى.
جيىندى اشقان وبلىس اكىمى مەملەكەت باسشىسى ايتقان تاپسىرمالاردى ورىنداۋدىڭ ماڭىزىن اتاپ ءوتتى.
جيىن بارىسىندا ش ب ك ا دامۋىنىڭ جاڭا كورىنىسى ۇسىنىلدى.
پرەزيدەنتتىڭ ءىس باسقارۋشىسىنىڭ ورىنباسارى رۋستام باياليەۆ ش ب ك ا- نى دامىتۋ بويىنشا مەملەكەتتىك ورگانداردىڭ ءوزارا ءىس-قيمىلى تۋرالى ايتتى.
شۋچە- بۋراباي كۋرورت ايماعىن دامىتۋ جانە تانىمال ەتۋ پەرسپەكتيۆالارى تۋرالى ق ر تۋريزم جانە سپورت ۆيتسە-ءمينيسترى ەرجان ەركىنبايەۆ ايتىپ بەردى.
ول سونداي-اق ايماقتىڭ تۋريستىك يندۋسترياسىنداعى اعىمداعى جانە جوسپارلانعان ءىس-شارالار تۋرالى ەسەپ بەردى.
كولىك ۆيتسە- ءمينيسترى تالعات لاستايەۆ كۋرورت ايماعىنىڭ كولىك ينفراقۇرىلىمىن دامىتۋ اسپەكتىلەرىنە ەگجەي-تەگجەيلى توقتالدى.
ۆەدومستۆونىڭ جوسپارىندا جولاۋشىلار مارشرۋتىنىڭ سانىن ەكى ەسە، ونىڭ ىشىندە اۋە جانە تەمىرجول تاسىمالدارىنىڭ سانىن ۇلعايتۋ قاراستىرىلعان.
اقمولا وبلىسىنىڭ تۋريزم باسقارماسىنىڭ باسشىسى اندرەي پودگۋرسكي كۋرورتتىق ايماقتى دامىتۋ جوسپارىنىڭ ءۇش كەزەڭى اياسىندا جۇزەگە اسىرىلىپ جاتقان ينجەنەرلىك ينفراقۇرىلىم جوبالارىنىڭ مارتەبەسى تۋرالى حابارلادى: بۋراباي كەنتىندە ينفراقۇرىلىمدىق جەلىلەردى جۇرگىزۋ، سۋ قۇبىرلارى مەن جىلۋ جەلىلەرىن جاڭعىرتۋ جاعدايىن كەڭىنەن بايانداپ بەردى .
سپيكەرلەر سونداي- اق كۋرورتتىق ايماقتىڭ كولىك ينفراقۇرىلىمىن دامىتۋ جانە تسيفرلىق تەحنولوگيالاردى ەنگىزۋ، تۋريزم سالاسىنىڭ ينۆەستيتسيالىق الەۋەتى، ەكولوگيالىق تۇراقتىلىق جانە قوعامدىق جاۋاپكەرشىلىك تۋرالى تالقىلادى.
«بىزگە كۋرورت ايماعىن دامىتۋدىڭ جاڭا كەشەندى جوسپارىنىڭ نەگىزىن قۇرايتىن تۇجىرىمدامالىق جاڭا ءتاسىل مەن ناقتى ءىس- ارەكەتتەر قاجەت. بۋراباي تەك قازاقستاندا عانا ەمەس، باسقا ەلدەردە دە تانىلاتىن تۋريستىك برەندكە اينالۋى ءتيىس»، - دەپ اتاپ ءوتتى م. احمەتجانوۆ.
كەڭەس سوڭىندا شۋچە- بۋراباي كۋرورت ايماعىنىڭ ەلدىڭ جەتەكشى تۋريستىك كلاستەرى رەتىندەگى پوزيتسياسىن ودان ءارى نىعايتۋ ءۇشىن العا قويىلعان جۇمىس باعىتتارى مەن جۇكتەلگەن مىندەتتەردى ىسكە اسىرۋدىڭ ناقتى مەرزىمى ايقىندالدى.
