بۋراباي كۋرورتىنا جولاۋشىلار اعىمى 30 پايىزعا ارتتى

استانا. KAZINFORM - جازعى ماۋسىمنىڭ باستالۋىمەن بۋراباي كۋرورتىنا پويىزبەن ساياحاتتاۋ تۋريستەر مەن جەرگىلىكتى تۇرعىندار اراسىندا بۇرىنعىدان دا تانىمال بولا ءتۇستى. بۋرابايعا ماۋسىم ايىندا ۇلتتىق تاسىمالداۋشىنىڭ ەلەكتر پويىزدارىمەن 49 مىڭنان استام ادام تاسىمالداندى. بۇل كورسەتكىش وتكەن جىلمەن سالىستىرعاندا 30 پايىزعا جوعارى، وتكەن جىلى تەمىرجول قىزمەتىن شامامەن 34 مىڭ جولاۋشى پايدالانعان بولاتىن.

جولاۋشىلاردىڭ ىڭعايلىلىعى ءۇشىن بيىل ۇلتتىق تاسىمالداۋشى «قاراعاندى- استانا- بۋراباي كۋرورتى» باعىتى بويىنشا جوعارى جىلدامدىقتى № 6811/6812 «استانا- بۋراباي كۋرورتى» ۋچاسكەسىندەگى ەلەكتر پويىزىنىڭ ءجۇرۋ ۋاقىتىن 2,5 ساعاتقا دەيىن قىسقارتتى. ەلەكتر پويىزى اپتاسىنا بەس رەت: دۇيسەنبى، سارسەنبى، جۇما، سەنبى جانە جەكسەنبى كۇندەرى جۇرەدى.

«سونىمەن قاتار، جازعى كەزەڭدە № 7509/7510 «پاۆلودار- استانا» جوعارى جىلدامدىقتى ەلەكتر پويىزىنىڭ باعىتى كوكشەتاۋ مەن بۋراباي كۋرورتىنا دەيىن ۇزارتىلدى (پويىز № 6805/6806). پويىز اپتاسىنا ەكى رەت: جۇما جانە جەكسەنبى كۇندەرى جۇرەدى.

بۇل شارالار بۋراباي كۋرورتىنا جولاۋشىلار اعىمىنىڭ ارتۋىنا ىقپال ەتتى. بيىل بۋرابايعا تەمىرجول كولىگىمەن 125 مىڭ جولاۋشى تاسىمالداۋ جوسپارلانۋدا»، - دەپ جازدى ق ت ج-دان.

سونداي-اق، بۋرابايعا كۇندەلىكتى № 6829/6830 «استانا- كوكشەتاۋ» جۇرەدى. ودان بولەك استانا-1 ستانسياسىنان № 7553/7556، № 6811/6812 «قاراعاندى- استانا- بۋراباي كۋرورتى» پويىزدارى جانە نۇرلى جول ۆوكزالىنان № 7507/7508 «استانا- كوكشەتاۋ» پويىزى قاتىنايدى.

جولاۋشىلارعا قولجەتىمدى بولۋ ءۇشىن ەلەكتر پويىزدارىنىڭ بيلەت قۇنى 2271 تەڭگەدەن 2943 تەڭگە ارالىعىن قۇرايدى. بيلەتتەردى bilet.railways.kz سايتىندا جانە تەمىرجول ۆوكزالدارىنداعى «جولاۋشىلار تاسىمالى» ا ق كاسسالارىندا 10 كۇننەن 1 كۇنگە دەيىن ساتىپ الۋعا بولادى.

اۆتور

اسحات رايقۇل