بۇقتىرماداعى كوپىردە 18-قازاننان باستاپ كولىك قوزعالىسى اشىلادى
وسكەمەن. KAZINFORM - شىعىس قازاقستان وبلىسى بۇقتىرما سۋ قويماسىنا سالىنعان كوپىردە 18- قازاننان باستاپ كولىك قوزعالىسىنا رۇقسات بەرىلەدى.
پرەزيدەنت تاپسىرماسىمەن بۇقتىرما سۋ قويماسىنا سالىنعان كوپىردەگى قۇرىلىس جۇمىستارى اياقتالىپ قالدى. 18-قازاننان باستاپ كوپىردە كولىك قوزعالىسىنا رۇقسات بەرىلەدى. ال كوپىردىڭ سالتاناتتى اشىلۋ ءراسىمى 20 -قازاندا ساعات 10:00-دە باستالادى. كۇرشىم اۋدانى اكىمدىگىنىڭ مالىمەتىنە سۇيەنسەك، بۇل كۇنى 30-عا تارتا كيىز ءۇي تىگىلمەك.
«قازاق كۇرەسى، قول كۇرەسى، اۋدارىسپاق، گىر كوتەرۋ، ارقان تارتۋ، جاياۋ جۇگىرۋدەن جارىس ۇيىمداستىرىلادى. رەسپۋبليكادان بولەك، ورتا ازياداعى ەڭ ۇزىن كوپىردىڭ اشىلۋى قارساڭىندا مادەني شارالار دا قولعا الىنباق. قازاقستانعا تانىمال ونەر ادامدارىنىڭ قاتىسۋىمەن كونسەرتتىك باعدارلاما ۇسىنىلادى. سۇيىنشىلەپ كەلگەن جۇرتقا اس بەرىلەدى»، - دەلىنگەن اقپاراتتا.
پاروم وتكەلىنىڭ جابىلۋى تۋرالى ءالى ايتىلمادى. كوپىر ارقىلى ءوتۋ اقىلى نەمەسە تەگىن بولاتىندىعى دا ناقتىلانعان جوق.
ەسكە سالساق، 2019 -جىلى 18-قىركۇيەكتە «ەگەمەن قازاقستان» گازەتىندە «ەلۋ جىل بۇرىنعى ەسكى پاروم ەلدى قاشانعى اۋرەگە تۇسىرەدى؟» دەگەن تاقىرىپپەن جۋرناليست ازامات قاسىمنىڭ ماقالاسى جاريالانعان بولاتىن. وسى ماقالادان كەيىن 19-قىركۇيەك كۇنى پرەزيدەنت قاسىم-جومارت توقايەۆ ۇكىمەت پەن شىعىس قازاقستان وبلىسى اكىمدىگىنە تۆيتتەر ارقىلى بۇقتىرما سۋ قويماسىنا كوپىر سالۋ ءۇشىن قارجى ءبولۋدى تاپسىردى. بۇل - ەلىمىزدەگى ەڭ ۇزىن كوپىر بولماق.
اۆتور
تالعاتجان مۇحامەتبەك ۇلى
