بۇقتىرما سۋ قويماسىنداعى كوپىر تەگىن بولا ما

وسكەمەن. KAZINFORM - شىعىس قازاقستان وبلىسىندا پرەزيدەنت تاپسىرماسىمەن بۇقتىرما سۋ قويماسىنا سالىنعان كوپىر تەگىن بولادى.

كۇنى كەشە عانا شىعىس قازاقستان وبلىسىنداعى بۇقتىرما سۋ قويماسى ارقىلى وتەتىن ەلىمىزدەگى ەڭ ۇزىن كوپىر اشىلعان بولاتىن. ۇزىندىعى 1316 مەتر ەكى جولاقتى اۆتوموبيل كوپىرى تاۋلىگىنە 80 مىڭعا دەيىن كولىك وتكىزە الادى.

ءبىراق وسىعان دەيىن كوپىر اقىلى بولۋى مۇمكىن ەكەندىگى ايتىلعان. ش ق و جولاۋشىلار كولىگى جانە اۆتوموبيل جولدارى باسقارماسى تۇپكىلىكتى شەشىم تاپسىرىس بەرۋشى - اۆتوموبيل جولدارى كوميتەتى كوپىردى جەرگىلىكتى اتقارۋشى ورگانعا بەرگەننەن كەيىن قابىلداناتىنىن حابارلاعان.

21-قازان كۇنى كوپىر رەسمي تۇردە اشىلعان سوڭ بۇل سۇراققا جاۋاپ بەرىلدى.

«كوپىرگە جول اقىسىن ەنگىزۋ ماسەلەسى بۇگىنگى كۇن تارتىبىندە جوق. كوپىر تەگىن بولادى»، - دەپ حابارلادى كولىك مينيسترلىگىنەن.

ەسكە سالساق، وسىعان دەيىن بۇقتىرما سۋ قويماسى ارقىلى وتەتىن ەلىمىزدەگى ەڭ ۇزىن كوپىر اشىلعانى حابارلانعان.

اۆتور
تالعاتجان مۇحامەتبەك ۇلى