بۇقتىرما سۋ قويماسى ارقىلى وتەتىن ەلىمىزدەگى ەڭ ۇلكەن كوپىر سالىنىپ جاتىر
وسكەمەن. KAZINFORM - شىعىس قازاقستان وبلىسى قۇيعان اۋىلىنىڭ ماڭىنداعى بۇقتىرما سۋ قويماسى ارقىلى وتەتىن ەكى جولاقتى اۆتوموبيل كوپىرىنىڭ قۇرىلىسى جالعاسىپ جاتىر. كوپىردىڭ جالپى ۇزىندىعى - 1316 مەتر. بۇل تۋرالى كولىك مينيسترلىگىنىڭ باسپا ءسوز قىزمەتى جازدى.
«بۇگىنگى كۇنى كوپىر تىرەكتەرىن سالۋ بويىنشا جۇمىستاردىڭ %81 - ى ورىندالدى: 21 تىرەكتىڭ 17- ءسى ورناتىلدى، قالعان 4 تىرەكتى ورناتۋ بويىنشا جۇمىستار جالعاسىپ جاتىر. سونداي-اق 20 ارالىق قۇرىلىمنىڭ 10-ى سالىندى. جۇمىستاردى ورىنداۋ ءۇشىن قاجەتتى الاڭداردى قامتاماسىز ەتەتىن ۋاقىتشا تەحنولوگيالىق كوپىردىڭ قۇرىلىسى تولىعىمەن اياقتالدى. كىرمە جولدا جەر توسەمىن ورناتۋ جانە قۇم-قيىرشىق تاس قوسپاسىنان جول جابىنىن توسەۋ بويىنشا جۇمىستار ورىندالدى. بۇدان ءارى قۇرىلىس-مونتاجداۋ جۇمىستارىن ىسكە اسىرۋ ءۇشىن بارلىق قاجەتتى ماتەريالدار دايىندالدى»، - دەپ اتاپ ءوتتى ق ر كولىك مينيسترلىگى اۆتوموبيل جولدارى كوميتەتىنىڭ ءتوراعاسى تولەگەن ابدۋللين.
جاسالىپ جاتقان جوبا ءوڭىر ءۇشىن ستراتەگيالىق ماڭىزعا يە. جوبانىڭ ءساتتى اياقتالۋى اباي جانە شىعىس قازاقستان وبلىسىنىڭ كولىك ينفراقۇرىلىمىن جاقسارتا تۇسپەك.
اۆتور
ەلميرا ورالبايەۆا
