بەننۋ استەرويدىنان توپىراق اكەلە جاتقان كاپسۋلا جەر بەتىنە امان- ەسەن قوندى

وسىدان جەتى جىل بۇرىن بەننۋ استەرويدىن زەرتتەۋ ءۇشىن ارنايى ۇشىرىلعان زوند جەر بەتىنە كاپسۋلا جىبەردى. كاپسۋلا ا ق ش- تىڭ يۋتا شتاتىنا كەلىپ قوندى. ونىڭ ىشىندە بەننۋدىڭ بەتىنەن الىنعان توپىراق بار، دەپ حابارلايدى قازاقپارات Euronews اگەنتتىگىنە سىلتەمە جاساپ.

Osiris-Rex زوندى كاپسۋلانى 102 مىڭ شاقىرىم قاشىقتىقتان وسىندا ۇشىرىپ جىبەرگەن.

توپىراق ۇلگىلەرى 2020 -جىلدىڭ قازانىندا الىنعان. بولجام بويىنشا، ول استەرويدتىڭ بەتىندە جەر جارالماي تۇرىپ، ءتىپتى كۇن جۇيەسى ومىرگە كەلمەي تۇرىپ پايدا بولعان زاتتار بار.

كاپسۋلانىڭ ىشىندەگى 250 گرام توپىراقتى زەرتتەۋ ءۇشىن ارنايى لابوراتوريا جابدىقتالعان. وندا 200-گە جۋىق عالىم 60 ءتۇرلى ادىسپەن زەرتتەۋ جۇرگىزەدى.

ال Osiris-Rex بولسا باسقا استەرويدتى زەرتتەۋ ءۇشىن ساپارىن ءارى قاراي جالعاستىرادى.

NASA كاپسۋلانىڭ 3,86 ميلليارد ميل جول ءجۇرىپ كەلگەنىن حابارلادى.

DW مالىمەتىنشە، ىستىققا ءتوزىمدى قابىقپەن قورعالعان، سالماعى شامامەن 46 ك گ جانە ديامەترى 81 س م بولاتىن كاپسۋلا كۇتىلگەن ۋاقىتتان ءۇش مينۋت ەرتە قوندى.

سوڭعى 13 مينۋتتا ول جەر اتموسفەراسى ارقىلى 44000 ك م/ساع جىلدامدىقپەن ۇشقان.

ديامەترى 550 مەتر بولاتىن بەننۋ استەرويدى وربيتاسىنىڭ جەرگە جاقىن ورنالاسۋىنا، استەرويدتىڭ كولەمىنە جانە قۇرامىندا بولۋى مۇمكىن ماتەريالدارعا بايلانىستى تاڭداپ الىنعان.

NASA ساراپشىلارى ونى جەر ءۇشىن ەڭ قاۋىپتى استەرويد دەپ سانايدى. الداعى 150 جىلدا ول جەرگە جاقىنداۋى مۇمكىن.

2016 -جىلدىڭ قىركۇيەگىندە سالماعى 2100 ك گ جانە ۇزىندىعى 6 مەتر بولاتىن OSIRIS- Rex ۇشقىشسىز عارىش كەمەسى كاناۆەرال مۇيىسىنەن ۇشىرىلىپ، 2018 -جىلدىڭ جەلتوقسانىندا اسپان دەنەسىنە جەتتى.

سودان كەيىن توپىراقتان سىناما الاتىن جەردى ىزدەۋگە كىرىستى.

2020 -جىلدىڭ قازان ايىنىڭ سوڭىندا NASA بەننۋ استەرويدىنداعى شاڭ مەن توپىراقتان سىناما ءساتتى الىنعانىن جاريالادى.

بەننۋ استەرويدىنان الىنعان توپىراق — امەريكالىق اپوللون باعدارلاماسىنان كەيىن عارىشتان جەرگە اكەلىنگەن ەڭ ماڭىزدى، ءىرى ۇلگى سانالادى.

جوبا قۇنى — شامامەن 800 ميلليون دوللار.