بەلگىلى سپورتشىنىڭ وتباسى 23 جاستاعى جىگىتتى قۇلدىقتا ۇستاعان
پەتروپاۆل. KAZINFORM - سولتۇستىك قازاقستان وبلىسىندا تانىمال سپورتشى ايشا ءۋاليشاننىڭ وتباسى اۋىلدا 23 جاستاعى جىگىتتى 10 ايدان ارتىق قۇلدىقتا ۇستاپ كەلگەن. قازىر وسى وقيعاعا قاتىستى قىلمىستىق ءىس قوزعالدى.
بۇل وقيعا تۋرالى ءبىرقاتار ب ا ق-تا جاريالاندى. الماتى وبلىسىنىڭ 23 جاستاعى تۇرعىنى مۇقان نەگماتوۆ جۋرناليستەرگە قالاي قۇلدىققا تۇسكەنى، قانداي ءزابىر كورىپ، قالاي قاشىپ شىققانى تۋرالى ايتىپ بەرگەن. جىگىتتىڭ ايتۋىنشا، ايەلدەر كۇرەسى بويىنشا ازيا ويىندارىنىڭ قولا جۇلدەگەرى ايشا ءۋاليشان جانە ونىڭ وتباسى 2023 -جىلى س ق و ءۋاليحانوۆ اۋدانى جاسقايرات اۋىلىنا 500-600 مىڭ تەڭگە جالاقى تولەيمىز دەپ الداپ اكەلگەن. سپورتشىنىڭ كۇيەۋى ءالفارابي ۇرىپ-سوعىپ، قارا جۇمىسقا جەككەن، زورلىق ارەكەتكە بارعان.
قۇمار ويىندارعا بەرىلگەن ەر ادام مۇقاننىڭ جاقىندارىن دا الداپ، قورقىتىپ، اقشا العان. جاسقايرات اۋىلىنداعى دياس دەگەن جىگىتتىڭ كومەگىمەن قۇلدىقتان قاشقان مۇقان نەگمانوۆ جانە ونىڭ وتباسى قازىر حالىقتان جانە قۇقىق قورعاۋ ورگاندارىنان كومەك سۇراپ وتىر.
س ق و پوليتسيا دەپارتامەنتى بۇل دەرەكتى راستادى.
«وسى فاكتى بويىنشا قىلمىستىق ءىس قوزعالدى. ءىستىڭ بارلىق ءمان-جايىن انىقتاۋ ماقساتىندا مۇقيات تەرگەۋ جۇرگىزىلىپ جاتىر. بارلىق دالەلدەر مەن ايتىلعان سوزدەر قولدانىستاعى زاڭناماعا سايكەس مۇقيات تەكسەرىلەدى. سوتقا دەيىنگى تەرگەپ-تەكسەرۋدىڭ باسقا دەرەكتەرى ق ر قىلمىستىق ءىس جۇرگىزۋ كودەكسىنىڭ 201-بابىنا سايكەس جاريا ەتىلۋگە جاتپايدى»، - دەلىنگەن س ق و پوليتسيا دەپارتامەنتى باسپا ءسوز قىزمەتى ۇسىنعان اقپاراتتا.
اۆتور
اقەركە داۋرەنبەك قىزى
