بلوگەرلەر تولەگەن سالىق قالاي باقىلانادى

استانا. KAZINFORM - مەملەكەتتىك كىرىستەر كوميتەتى بلوگەرلەردىڭ سالىق تولەگەنى نە تولەمەنى قالاي باقىلاناتىندىعىن اتادى.

ۆەدومستۆو مالىمەتىنشە، بلوگەرلەرگە سالىقتىق باقىلاۋ ورناتىلعان. ونىڭ اياسىندا مونيتورينگ تۇراقتى نەگىزدە مىناداي باعىتتار بويىنشا جۇرگىزىلەدى:

- سالىق ورگاندارىندا تىركەۋ ماسەلەلەرى بويىنشا؛

- كاسىپكەرلىك قىزمەتتەن تۇسەتىن كىرىستى تومەندەتۋ ماسەلەلەرى بويىنشا ءىس جۇرگىزۋ.

باقىلاۋ شارالارى بارىسىندا ءار ءتۇرلى اقپارات كوزدەرى، ونىڭ ىشىندە مەملەكەتتىك جانە وزگە دە ورگانداردىڭ، حالىقارالىق كەلىسىمدەر اياسىندا شەت مەملەكەتتەردىڭ سالىق قىزمەتتەرىنىڭ مالىمەتتەرى پايدالانىلادى. بۇدان باسقا، مەملەكەت ۋاكىلەتتى جانە وزگە دە ورگاندارعا سالىقتىق اكىمشىلەندىرۋ اۋقىمىندا سالىق ورگاندارى ءۇشىن قاجەتتى مالىمەتتەردى الۋعا جاردەمدەسۋ بولىگىندە مىندەت جۇكتەلدى. بۇزۋشىلىق انىقتالعان جاعدايدا كامەرالدىق باقىلاۋ جۇرگىزىلەدى، ونىڭ قورىتىندىسى بويىنشا حابارلامالار جىبەرىلەدى، - دەپ ناقتىلايدى كوميتەتتەن.

حابارلامالار ورىندالماعان كەزدە سالىق ورگاندارى سالىقتىق تەكسەرۋلەردى تاعايىنداۋعا قۇقىلى.

«جالپى، ءبىز بارلىق بلوگەردى سالىق مىندەتتەمەلەرىن ۋاقتىلى ورىنداۋعا شاقىرامىز. بۇگىنگى تاڭدا كاسىپكەرلىكتى دامىتۋ ءۇشىن قولايلى جاعداي جاسالۋدا جانە سالىق تولەۋشىلەرگە سالىق مىندەتتەمەلەرىن ورىنداۋدىڭ ءارتۇرلى ىڭعايلى تاسىلدەرى بار»، - دەدى ۆەدومستۆودان.

بۇعان دەيىن بلوگەرلەر 9 ايدا 1,2 ميلليارد تەڭگە سالىق تولەگەنىن جازعان ەدىك.