«بەلدەۋ جانە جول» فورۋمىندا 97,2 ميلليارد دوللارعا كەلىسىم جاسالدى - قىتاي ءتوراعاسى

 «ءبىر بەلدەۋ، ءبىر جول» فورۋمىندا ىسكەرلىك كونفەرەنتسياعا قاتىسۋشىلار جالپى سوماسى 97,2 ميلليارد دوللارعا ىنتىماقتاستىق تۋرالى كەلىسىمگە قول قويدى. بۇل تۋرالى بەيجىڭدە وتكەن جوعارى دەڭگەيدەگى «بەلدەۋ جانە جول» Ⅲ فورۋمىنىڭ اشىلۋىندا ق ح ر ءتوراعاسى شي جينپيڭ مالىمدەدى، دەپ حابارلايدى Kazinform ءتىلشىسى. 

«وسى فورۋم اياسىندا وتكەن باس ديرەكتورلار كونفەرەنسياسىندا 97,2 ميلليارد دوللارعا ىنتىماقتاستىق تۋرالى كەلىسىمدەر جاسالدى»، - دەپ اتاپ ءوتتى شي جينپيڭ.

اتاپ وتۋىنشە، قىتاي «جاسىل» ينفراقۇرىلىم، «جاسىل» ەنەرگەتيكا جانە «جاسىل» كولىك سىندى سالالاردا ىنتىماقتاستىقتى تەرەڭدەتۋدى، سونداي- اق «بەلدەۋ جانە جول» باستاماسى اياسىنداعى حالىقارالىق جاسىل دامۋ وداعىنا قولداۋدى كۇشەيتۋدى جالعاستىرادى.

17-18-قازان كۇندەرى بەيجىڭدە «ءبىر بەلدەۋ، ءبىر جول» Ⅲ فورۋمى ءوتىپ جاتىر. وعان 150-دەن استام ەلدەن 4 مىڭنان استام دەلەگات قاتىسۋدا. ونىڭ ىشىندە 20 دان استام مەملەكەتتىڭ باسشىلارى بار.

شارا اياسىندا 150 دەن استام مەملەكەت پەن 30 دان استام حالىقارالىق ۇيىم ىنتىماقتاستىق تۋرالى قۇجاتتارعا قول قويدى.

ەسكە سالايىق، قازاقستان پرەزيدەنتىنىڭ بەيجىڭگە رەسمي ساپارىنىڭ ەكىنشى كۇنى «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنىڭ اشىلۋ راسىمىنە قاتىسۋدان باستالدى.

ق. توقايەۆتىڭ قىتايعا رەسمي ساپارى 17-قازاندا باستالدى.