بۇلبۇل ءانشىنىڭ باسىنان كەشكەن اۋىر تاعدىرى
قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى بيبىگۇل تولەگەنوۆانىڭ ونەردەن بولەك ءومىرى جايلى رەسەيلىك رەجيسسەر الەكساندر زامىسلوۆتىڭ دەرەكتى فيلمىندە بايانداعان.
ءتۇسىرۋ توبىنا بەرگەن سۇحباتىندا بۇلبۇل ءانشى باسىنان كەشكەن وقيعالاردى باياندايدى. جوبادا ايتىلعان مالىمەتكە سۇيەنسەك، ك س ر و حالىق ءارتيسى ونەرلى وتباسىندا دۇنيەگە كەلگەن. اكەسى سكريپكادا ويناسا، ال اناسى ءان سالعاندى جاقسى كورگەن ەكەن. الايدا 1937 - جىلى قاتون-قاراعايدا اكەسى قۋدالاۋعا ۇشىراپ، اقىر اياعىندا ءىز-تۇزسىز جوعالىپ كەتەدى.
وتباسىنداعى اۋىرتپالىق 7 جاسار بيبىگۇلدى ەرتە ەسەيتەدى. تىرەگىنەن ايىرىلعان اۋلەتتى امان-ساقتاپ قالۋ قارشاداي قىزدىڭ يىعىنا تۇسەدى. كەشكى مەكتەپتە ءبىلىم الا ءجۇرىپ، ەڭبەككە ارالاسادى. كۇنكورىس قامىمەن ەت كومبيناتىندا جۇمىسقا تۇرادى. قولى قالت ەتكەندە، كوركەمونەر ۇيىرمەسىنە قاتىسىپ، ءان سالادى. ءسويتىپ جۇرگەندە، ورىمدەي قىزدىڭ بويىنداعى تىلسىم تالانتتى تانىمال كەڭەس جازۋشىسى گالينا سەرەبرياكوۆا ءتاپ باسىپ، تانيدى. ونەرلى قىزعا سايا بولىپ، قامقورلىعىنا الادى. مۋزىكالىق ساۋاتىن اشادى. كەيىن الماتى كونسەرۆاتورياسىنىڭ ۆوكالدىق-حور فاكۋلتەتىنە وقۋعا جىبەرەدى. ءانشىنىڭ ودان كەيىنگى ءومىرى تىڭدارماندارىنىڭ كوز الدىندا دەسەك، قاتەلەسپەيمىز. ساحنا ساڭلاعى وتكەنگە كوز جىبەرە وتىرىپ، بۇگىنگى شىققان بيىگىنە، قۇدايعا شۇكىرشىلىك ەتەدى.
«قۇرمەت تاقتاسى» جوباسىنا بەرگەن سۇحباتىندا بيبىگۇل تولەگەنوۆا ءومىر جولىنداعى ۇمىتىلمايتىن قاسىرەتتى ساتتەردى دە ەسكە الادى. 13 جاسىندا كىشكەنتاي ءسىڭلىسىن ءوز قولىمەن جەر قوينىنا تاپسىرعانى ءالى كۇنگە ەسىنەن كەتپەيتىنىنە قىنجىلىس بىلدىرەدى. «...كورشىمىز ەكەۋىمىز زيرات باسىنا باردىق، مەن 7 جاسار ءسىڭلىمدى كومۋىم كەرەك بولدى. كورشىم قازادى، ودان كەيىن شۇڭقىرعا تۇسەدى دە «باسىم كورىنە مە؟» دەپ سۇرايدى. ءبىز ءتىپتى ولگەن ادامدى جەرلەگەلى جاتقانىمىزدى جەتە تۇسىنبەدىك. ودان سوڭ شوپتەردى جينادىم دا ءسىڭلىمنىڭ ۇستىنە سەۋىپ تاستادىم» دەپ كۇرسىنەدى ءانشى.
ونەر يەسى جەكە ومىرىندەگى ساتسىزدىكتەر جايلى دا جاسىرمايدى. ءۇش رەت تۇرمىسقا شىعىپ، ءدام-تۇز جاراستىرا الماعانىن اشىق ايتقان. «مەنىڭ ومىرىمدە ماعان كومەكتەسەتىن ەر ادامدار كەزدەسپەدى. ماعان «حالىق ارتيسىنە ۇيلەنسەم، دەمەك، ءبارى جاقسى بولادى. ەشبىر قيىندىق كورمەيمىن» دەگەن ەر-ازاماتتار جولىقتى. ءسال قيىندىققا تاپ بولسا، ارتقا شەگىنەتىن ەدى. وكىنىشكە قاراي، مەنىڭ جانىمنان وسىنداي ادامدار تابىلدى» دەيدى.
اياۋلى قىزى ماريامگۇلدىڭ ومىردەن وتكەنى دە 83 جاستاعى تانىمال تۇلعاعا وڭاي تيمەگەن. «اسا شىدامدى بولۋ كەرەك، ۇلكەن قۋانىشتاردى اسا ەموسيونالدى تۇردە قابىلداۋعا، اۋىر ساتتەردە ءوزىڭدى قاتتى جەگىدەي جەۋگە دە بولمايدى. بارلىعىنا پاراساتپەن قاراپ، ۇلكەن توزىمدىلىك تانىتۋ كەرەك» دەيدى ونەر يەسى.
الەكساندر زامىسلوۆ «بيبىگۇل احمەت قىزىمەن جۇمىس ىستەۋ اسا قيىندىق تۋدىرعان جوق. ول كىسى وتە سابىرلى، پاراساتتى جان ەكەن. اڭگىمە بارىسىندا كوپتەگەن قۇندى دەرەكتەردىڭ بەتى اشىلدى. ورامدى ويلارىمەن ءبولىستى. ءتۇسىرىلىم جۇمىستارى كەزىندە ەشقانداي كەدەرگىلەر بولعان جوق. حالىق ءارتيسى، مۇمكىندىگىنشە، بىزگە جاعداي جاساۋعا تىرىستى. ءبىزدىڭ تالاپ-تىلەكتەرىمىزدىڭ ءبارىن جەرگە قالدىرماي، ورىندادى. اقجارقىن مىنەزىمەن، ادەمى كۇلكىسىمەن ءتانتى ەتتى» دەيدى.
دەرەككوز: «ايقىن» گازەتى. ( 2013 -جىل)
