بەلارۋس پرەزيدەنتى وزبەكستانعا رەسمي ساپارمەن بارادى

مينسك. KAZINFORM - وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆتىڭ شاقىرۋىمەن بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو 7-9- اقپاندا رەسمي ساپارمەن وزبەكستاندا بولادى، دەپ حابارلايدى قازاقپارات ءو ر پرەزيدەنتىنىڭ باسپا ءسوز قىزمەتىنە سىلتەمە جاساپ.

ساپار باعدارلاماسىنا سايكەس وزبەكستان مەن بەلارۋس اراسىنداعى كوپجاقتى ىنتىماقتاستىقتى ودان ءارى كەڭەيتۋگە باعىتتالعان جوعارى دەڭگەيدەگى كەلىسسوزدەر وتكىزۋ جوسپارلانعان.

ءوزارا تاۋار اينالىمىن ارتتىرۋ، اۋىل شارۋاشىلىعى، ونەركاسىپ، فارماتسيەۆتيكا، بايلانىس جانە باسقا دا سالالارداعى كووپەراتسيالىق بايلانىستاردى دامىتۋ ماسەلەلەرى باستى نازاردا بولادى.

سونداي-اق كاسىپتىك ءبىلىم، دەنساۋلىق ساقتاۋ، مادەنيەت، سپورت جانە تۋريزم سالالارىنداعى سەرىكتەستىكتى دامىتۋ باعدارلامالارى تالقىلانادى.