«بۇل ەرتەگى سەكىلدى»: ۋرازباحتين «رەالمەن» بولاتىن ويىن الدىنداعى اسەرىمەن ءبولىستى

استانا. KAZINFORM - الماتىلىق «قايرات» كلۋبىنىڭ باس باپكەرى رافاەل ۋرازباحتين 2026 -جىلعى الەم چەمپيوناتىنا ىرىكتەۋ كەزەڭىنىڭ بەسىنشى تۋرىندا قازاقستان مەن ۋەلس قۇرامالارى اراسىنداعى (0:1) ماتچتى قورىتىندىلادى.

 بۇل ويىندا ونىڭ كومانداسىنىڭ بىرنەشە فۋتبولشىسى الاڭعا شىققان بولاتىن، دەپ حابارلايدى Kazinform ءتىلشىسى.

باپكەردىڭ ايتۋىنشا، ونىڭ ويىنشىلارى - تەمىرلان اناربەكوۆ، داستان ساتپايەۆ جانە دامير قاسابۋلات - وزدەرىنە جۇكتەلگەن مىندەتتەردى تولىق ورىنداپ، سەنىمدى ويىن كورسەتتى.

- اناربەكوۆ وتە سەنىمدى وينادى، بىرنەشە ساتتە قۇتقارىپ قالدى. گول سوعىلعان ەپيزودتا دا ارەكەت ەتتى، ءبىراق، وكىنىشكە قاراي، دوپتى قايتادان سوعىپ ۇلگەردى، - دەدى ۋرازباحتين.

ونىڭ ايتۋىنشا، قاسابۋلات تا جوعارى دەڭگەيدە ويناپ، جان-جاقتى ويىن ۇلگىسىن كورسەتتى.

سونداي-اق باپكەر جارتىلاي قورعاۋشى تاپالوۆتىڭ تىزەسىنەن ازداعان جاراقات العانىن، الايدا الداعى ماتچتاردا كومانداعا كومەكتەسە الاتىنىن ايتتى.

- ول «سپورتينگكە» قارسى ماتچقا دەيىن تولىق جازىلىپ ۇلگەرەدى دەپ ويلايمىن. ءتىپتى بەلگيامەن بولاتىن ويىنعا دا دايىن بولۋى مۇمكىن، - دەدى ول.

«قايراتتىڭ» چەمپيوندار ليگاسىنداعى الداعى ويىنى تۋرالى ايتا كەلە، ۋرازباحتين مادريدتىك «رەالمەن» بولاتىن كەزدەسۋدى ەرەكشە وقيعا دەپ اتادى.

- مۇمكىن، ولاردى كوزبە- كوز كورگەن كەزدە عانا بۇل شىندىق ەكەنىن تۇسىنەتىن شىعارمىز. قازىر ءبارى ەرتەگى سياقتى سەزىلەدى، - دەدى ول.

ۋرازباحتيننىڭ ايتۋىنشا، كلۋبتىڭ توپتىق كەزەڭدەگى باستى ماقساتى - قازاقستاندى لايىقتى دەڭگەيدە تانىتۋ جانە ءار ماتچقا بارىنشا دايىن بولۋ.

ەسكە سالايىق، بۇگىن قازاقستان قۇراماسى ۋەلس كومانداسىنان 0:1 ەسەبىمەن جەڭىلىپ قالدى. بۇعان دەيىن ۇلتتىق قۇرامانىڭ باس باپكەرى ءالي الييەۆ جەڭىلىس سەبەبىن تۇسىندىرگەن بولاتىن.

قازاقستان قۇراماسى كەلەسى ويىنىن 7 قىركۇيەكتە بريۋسسەلدە بەلگياعا قارسى وتكىزەدى.

بۇدان بۇرىن الماتى پوليسياسى قالا تۇرعىندارى مەن قوناقتارىن الداعى وتەتىن قايرات - رەال مادريد فۋتبول ماتچىنا بيلەت ساتىپ الۋ كەزىندە ساق بولۋعا ۇندەدى.