بۇل قاي عاسىرداعى مەكتەپ: ب ق و-داعى مەكتەپتىڭ جاي- كۇيىنە بايلانىستى ءبىلىم باسقارماسى جاۋاپ بەردى
ورال. KAZINFORM - باتىس قازاقستان وبلىسى بوكەي ورداسى اۋدانى جەتىباي اۋىلىنداعى جامبىل باستاۋىش مەكتەبى تۋرالى الەۋمەتتىك جەلىدە بەينەجازبا تارادى.
بەينەجازبادا اتالعان ءبىلىم وشاعىندا باستاۋىش سىنىپ وقۋشىلارى عانا وقيتىنى ايتىلادى.
- ولار ءتورتىنشى سىنىپتان كەيىن ءبىلىمىن اۋىلدان 500 شاقىرىم جەردە ورنالاسقان اۋداندىق مەكتەپ-ينتەرناتتا جالعاستىرادى. جەرگىلىكتى تۇرعىندار بۇل مەكتەپتى جىل سايىن وزدەرى سىرلاپ، اقتاپ، تازالايتىنىن جازدى. ءبىلىم ورداسىنىڭ ۆيدەوسىن كورگەن جەلى قولدانۋشىلارى: «مىناۋ قاي عاسىرداعى مەكتەپ؟»، «اكىم مەن ءبىلىم باسقارماسى قايدا ەكەن؟»، «قوجانىڭ مەكتەبى بۇدان جاقسى ەدى عوي» دەپ پىكىر قالدىردى، - دەگەن سوزدەر كەلتىرىلگەن.
وسىعان بايلانىستى ب ق و ءبىلىم باسقارماسى تۇسىنىك بەردى.
ءبىلىم باسقارماسىنان تۇسكەن مالىمەتكە قاراعاندا، بوكەي ورداسى اۋدانى، جەتىباي اۋىلىنداعى جامبىل باستاۋىش مەكتەبىندە 2025-2026 وقۋ جىلىندا 15 وقۋشى ءبىلىم الىپ جاتىر، ونىڭ ىشىندە 1-سىنىپقا 4 بالا قابىلدانعان. وقۋ ۇدەرىسىن 6 پەداگوگ قامتاماسىز ەتەدى. مەكتەپ عيماراتى 1984 -جىلى سالىنعان، اۋدان ورتالىعىنان 856 وبلىس ورتالىعىنان 500 شاقىرىم قاشىقتىقتا ورنالاسقان.
- مەكتەپ Starlink جۇيەسى ارقىلى ينتەرنەتكە قوسىلعان، ەكى وقۋ كابينەتىندە ينتەراكتيۆتى پروەكتور ورناتىلعان. سونداي-اق مەكتەپتە 8 ساندىق بەينەباقىلاۋ كامەراسى جۇمىس ىستەيدى. بارلىق وقۋشى تەگىن ىستىق تاماقپەن قامتىلعان. بيىل مەكتەپكە اعىمداعى جوندەۋ جۇرگىزىلدى. 2026 -جىلى مەكتەپ اۋلاسىنا ورنەكتاس (برۋسچاتكا) توسەۋ، ال 2028 -جىلى كۇردەلى جوندەۋ جۇرگىزۋ جوسپارلانعان، - دەپ حابارلادى ۆەدومستۆودان.
اۆتور
عايساعالي سەيتاق
