"بۇل بالا ءسوز تۇسىنبەيتىن بولىپ تۇر!" تانىمال اقىن تورەعالي تورەالىنى سوتقا بەرمەكشى

اقىن، قازاقستان جازۋشىلار وداعىنىڭ مۇشەسى مۇنايدار بالمولدا "قازاقتىڭ جىلقىلارى" دەگەن ءانىن تورەعالي تورەالى "ۇرلاپ العانىن"، سول ءۇشىن ونى سوتقا بەرەتىنىن ايتتى.

بۇل تۋرالى ول الەۋمەتتىك جەلىدەگى پاراقشاسىندا ءبولىستى. ونىڭ ايتۋىنشا، ءانشى ولەڭنىڭ ءسوزىن وزگەرتىپ، قاينار االگوزوۆكە جازدىرىپ العان.

"مەنىڭ "قازاقتىڭ جىلقىلارى" ولەڭىمە جازىلعان التىنبەك كارەسوۆ ەكەۋمىزدىڭ انىمىزگە تورەعالي تورەالىنىڭ كوزى ءتۇسىپتى! تۇسكەنى قۇرسىن، ۇرلاپ الىپ، ءسوزىن جوق قىلىپ، ونىڭ ورنىنا ق. الاكوزوۆكە ءسوز جازعىزىپ الىپ، ءبىر قوجالىقتىڭ ءانى قىلىپ، ايتىپ ءجۇر ەكەن! تيك- توكتان ءبىر بايقاپ قالىپ، ەسكەرتۋ جاسادىم. جاقسىلىقپەن قويا عوي، مەنىڭ اۆتورلىق قۇقىما قولىڭدى سۇقپا دەپ! جوق، بۇل بالا ءسوز تۇسىنبەيتىن بولىپ تۇر! يۋتۋب ارناسىندا، ءوزىنىڭ پاراقشاسىندا وسى ءان تۇر دەپ ماعان جىگىتتەر حابارلاسىپ جاتىر. بۇل ءانشى جىگىت التىنبەككە (كومپوزيتورعا - ەسك. ) حابارلاسىپ، ءاندى سۇراپتى. التىنبەك ءوزىنىڭ كەلىسەتىنىن ايتىپ، ءبىراق "مۇنايدار اعامنان رۇقسات سۇراڭىز" دەپتى. ال تورەعالي مەنى ادام ەكەن دەمەگەن، اعام ەكەن دەمەگەن، ءوزىم بىلەمگە سالىپتى. ال وسىنىسى دۇرىس پا؟ مەنەن سۇراعان دا جوق. مەن رۇقسات بەرمەيتىن دە ەدىم. ءسوزىن وزگەرتپەي ايتسا، وندا ويلاناتىن ەدىم. ول مەنىڭ ءسوزىمدى جوق قىلعان عوي. ءان ولەڭىمە بولا تۋدى، سوعان ارنايى جازىلدى! ءبىرىنشى ولەڭ تۋدى، سوعان مەنىڭ تاپسىرىسىممەن ءان جازىلدى. سوندا بۇل ءاننىڭ اۆتورى كىم؟ " - دەپ جازعان ول.

اقىن ءانشىنى سوتقا بەرۋ كەرەگىن جاسىرمادى.

"سوتقا بەرسەم شە؟ مەنىڭ ءانىمدى رۇقساتىمسىز العانى ازداي، ونىمەن وزىنە جالعان ابىروي جيناپ ءجۇر. مۇعالجار جىلقىسى جايلى اندەتىپ، بىرەۋلەردەن اقشا الىپ، مەيماناسى تاسىپ تۇرعان بولار. وسىلاي مەنىڭ قازاقتىڭ جىلقىلارىنا، ياكي ۇلتىمىزدىڭ، حالقىمىزدىڭ اسىل جانۋارىنا ارناعان ءانىمدى تاپاپ وتپەكشى، جوق قىلماقشى! سىزدەرمەن اقىلداسايىن دەپ شەشتىم. تورەعاليدى سوتقا بەرەيىن بە، جوق پا؟ ونىكى ادامدىققا جاتا ما؟ ءبىرازدان بەرى ايتىلىپ، ءتىپتى بەينەبايان دا تۇسىرىلگەن ءاندى بۇلاي يەمدەنىپ الۋىنا جول بەرىپ قويىپ وتىرا بەرەيىن بە؟ ءوزىم سوتتاسۋدى جاراتپايمىن. بۇل ءبىرىنشى رەت! "قۇدايعا تەلەفون سوققان بالا" اڭگىمەمدى بىرەۋلەر ۇرلاپ، فيلم ءتۇسىرىپ تاستادى. ولاردى اياپ، سوتقا بەرمەدىم. ال ەندى انىمە شابۋىل جاساپ وتىر. اشىق كۇندە. ەش ۇيالماي، قىسىلماي. بۇل تورەعالي اتاقتى بولسام، اۋمەسەر بولسام، ماعان ءبارى جاراسادى دەپ ويلاي ما ەكەن؟ تورەعالي ءبىزدىڭ "قازاقتىڭ جىلقىلارى" انىنەن "مۇعالجار جىلقىلارى" دەگەن، ءبىر اۋماقتىڭ، شارۋا قوجالىقتىڭ ءانىن شىعارىپ العان. سىزگە جالپى قازاعىمنىڭ جىلقىلارى قىمبات پا، الدە ءبىر عانا مۇعالجار تۇقىمى ما؟ ادامنىڭ سوتىنا بەرمەي، اللانىڭ سوتىنا تاپسىرايىن با؟ ەكىنشىسى وتە اۋىر. ول قيامەتكە كەتەدى. مەنەن كەشىرىم سۇراپ، دوعارا قويسا، مەن كەشىرەر ەدىم. ولاي ىستەيتىن ارلى ازاماتتى، ۇياتتى ادامدى ازىرگە كورمەدىم. مەن ءالى اياپ وتىرمىن. تۇسىنەر، كەشىرىم سۇرار دەپ. "ۇلى دالانىڭ بالاسىمىن" دەپ كەۋدەسىن كوتەرۋشى ەدى، قايدا سونىسى؟ ۇلى دالانىڭ جىلقىلارىنا ارناعان ءاندى جوق قىلىپ، ونىڭ ورنىنا ءبىر عانا تۇقىمدى ماقتاعان، اقشا ءۇشىن جازىلعان دۇنيەسىن كۇيتتەگەنى ۇلتتى قورلاعانداي بولدى!" - دەپ سىناپ تاستاعان اقىن.

سونداي- اق، مۇنايدار بالمولدا بۇل ءان 2019 -جىلعى اقپاندا جارىق كورىپ، "بورىدە نە ارمان بار" كىتابىنا ەنگەنىن ايتتى.

Massaget.kz