«بۇل گازاداعى سوعىستىڭ سوڭى ەمەس...» : سينۆاردىڭ ولىمىنە الەمنىڭ رەاكسياسى

استانا. KAZINFORM – ا ق ش پرەزيدەنتى دجو بايدەن حاماس جەتەكشىسى ياحيا سينۆاردىڭ كوزى جويىلعاننان كەيىن تاياۋ شىعىستاعى قاقتىعىستى ساياسي رەتتەۋگە مۇمكىندىك تۋدى دەگەن پىكىر ءبىلدىردى. گەرمانيا مەن فرانسيا باسشىلارى گازاداعى اتىستى توقتاتۋعا شاقىردى، دەپ جازادى euronews.

ا ق ش پرەزيدەنتى دجو بايدەن يزرايل اسكەرى حاماس جەتەكشىسى ياحيا سينۆاردى ولتىرگەننەن كەيىن تاياۋ شىعىستاعى قاقتىعىستى ساياسي رەتتەۋ مۇمكىن ەكەنىن ايتىپ، سينۆاردىڭ بۇل ماقساتقا جەتۋ جولىندا الىنبايتىن كەدەرگى بولعانىن اتاپ ءوتتى.

«العا جىلجي بەرىڭدەر، گازاداعى اتىستى توقتاتۋعا بەت الامىز. بۇكىل الەم ءۇشىن جاعدايدى جاقسارتا الاتىن باعىتقا قاراي جۇرەمىز. بۇل سوعىستى اياقتاپ، كەپىلگە الىنعانداردى ۇيلەرىنە قايتاراتىن ۋاقىت كەلدى»، - دەدى امەريكا پرەزيدەنتى.

گەرمانيا كانتسلەرى ولاف شولتس پەن فرانتسيا پرەزيدەنتى ەممانۋەل ماكرون دا تەز ارادا اتىستى توقتاتۋعا جانە حاماس تۇتقىنعا العانداردى قايتارۋعا شاقىردى.

«گازاداعى سوعىس اياقتالعاننان كەيىنگى كۇنى يزرايلگە سەنىمدى قاۋىپسىزدىك كەپىلدىگى قاجەت بولادى. پالەستينا بيلىگىن رەفورمالاۋ كەرەك. ەكى مەملەكەتتى شەشىمگە قاراي ىلگەرىلەتۋ كەرەك»، - دەدى فرانسيا باسشىسى.

بۇعان دەيىن حاماس كوشباسشىسى ياحيا سينۆار گازادا ولتىرىلگەنىن حابارلاعان بولاتىنبىز.

ارتىنشا «حەزبوللا» حاماس جەتەكشىسى ولتىرىلگەننەن كەيىن يزرايلمەن سوعىستى كۇشەيتەتىنىن مالىمدەدى.