بۇل اپتا رەسەي مەن ۋكراينا ءۇشىن ماڭىزدى بولادى - ترامپ

استانا. KAZINFORM - ا ق ش پرەزيدەنتى دونالد ترامپ جاقىن ارادا رەسەي- ۋكراينا قاقتىعىسى قايتا قۇرۋ مەن ساۋداعا باسا نازار اۋدارعىسى كەلەتىن امەريكانىڭ دەلدالدىعىمەن اياقتالاتىنىنا ءۇمىت ءبىلدىردى، دەپ حابارلايدى Kazinform.

- بۇل رەسەي مەن ۋكراينا ءۇشىن تاماشا كۇن شىعار! وسى بىتپەيتىن «قاندى قىرعىن» اياقتالسا، جۇزدەگەن مىڭ ادامنىڭ ءومىرى ساقتالىپ قالاتىنى تۋرالى ويلانىڭىز. مەن مۇنىڭ بولۋىن قامتاماسىز ەتۋ ءۇشىن ەكى جاقپەن دە جۇمىستى جالعاستىرامىن. ا ق ش قالپىنا كەلتىرۋ مەن ساۋداعا نازار اۋدارعىسى كەلەدى. الدا ماڭىزدى اپتا! - دەپ جازدى دونالد ترامپ Truth Social دا.

ترامپ قاقتىعىسۋشى تاراپتاردىڭ كەزدەسۋى بەيسەنبى كۇنى تۇركيادا ءوتۋى مۇمكىن ەكەنىن حابارلادى.

- رەسەي پرەزيدەنتى پۋتين ۋكراينامەن اتىستى توقتاتۋ تۋرالى كەلىسىم جاساعىسى كەلمەيدى، كەرىسىنشە، قانتوگىستى توقتاتۋ مۇمكىندىگى تۋرالى كەلىسسوز ءۇشىن بەيسەنبى كۇنى تۇركيادا كەزدەسكىسى كەلەدى. ۋكراينا بۇعان دەرەۋ كەلىسىم بەرۋى كەرەك، - دەپ پىكىر ءبىلدىردى ا ق ش پرەزيدەنتى.

امەريكالىق كوشباسشى اتاپ وتكەندەي، بۇل كەزدەسۋ ەۋروپالىق كوشباسشىلار مەن ا ق ش- تىڭ ءتيىستى تۇردە ارەكەت ەتۋى ءۇشىن «مامىلەنىڭ مۇمكىن بولۋ- بولماۋىن» جانە «ءىستىڭ قالاي ءجۇرىپ جاتقانىن» كورسەتە الادى.

بۇل رەتتە ترامپ ۋكراينانىڭ رەسەيمەن كەلىسسوز جۇرگىزەتىنىنە كۇمان كەلتىردى.

- ۋكراينانىڭ پۋتينمەن مامىلەگە كەلەتىنىنە كۇماندانا باستادىم، - دەدى ول، ءبىراق داۋلاسۋشى تاراپتارعا: كەزدەسۋدى ءدال قازىر باستايىق!!! - دەپ ۇندەۋ تاستادى.

بۇعان دەيىن پۋتين ۋكرايناعا الدىن الا شارتسىز كەلىسسوزدەردى قايتا باستاۋ جونىندە ۇسىنىس جاسادى.