بۇكىل الەمدىك جاۋىنگەرلىك ونەر ويىندارىندا قازاقستان ۇزدىك ۇشتىككە كىردى

سپورت
فوتو - سپورتتى دامىتۋ ديرەكسياسى

 ساۋد ارابياسىنىڭ استاناسى ءار-رياد قالاسىندا اياقتالعان V بۇكىل الەمدىك جاۋىنگەرلىك ونەر ويىندارىندا قازاقستان قۇراماسى ۇزدىك ۇشتىككە كىردى، دەپ حابارلايدى Kazinform. 

سپورتتى دامىتۋ ديرەكسياسىنىڭ باسپا ءسوز قىزمەتىنەن ءمالىم ەتكەنىندەي، بيىلعى ويىندار قازاقستان ءۇشىن ەڭ تابىستى بولدى.

ون ءبىر كۇننىڭ ىشىندە 16 سپورت تۇرىنەن 1500 دەن استام اتلەت 954 مەدالدى ءوزارا ساراپقا سالدى. ونىڭ 259 ى التىن، 259 ى كۇمىس بولسا، قالعان 436 سى - قولا.

قازاقستان دەلەگاتسياسى 12 التىن، 13 كۇمىس پەن 23 قولا مەدال جەڭىپ الىپ، جالپى ەسەپتە 3-ورىنعا كوتەرىلدى. كوش باسىندا ۋكراينا (21 التىن، 17 كۇمىس، 15 قولا)، ودان كەيىن سوڭعى جارىس كۇنى ەكىنشى ورىنعا شىققان ساۋد ارابياسى (12 التىن، 20 كۇمىس، 19 قولا) تۇر.

سپورت
فوتو: Kazinform

بۇكىل الەمدىك جاۋىنگەرلىك ونەر ويىندارىنا ءوز سپورتشىلارىن جىبەرگەن 120 دان استام ەلدىڭ 87 سىنە جۇلدە بۇيىردى.

قازاقستان دەلەگاتسياسى ءۇشىن ءار-ريادتاعى كەشەندى جارىستىڭ ءار كۇنى تاريحي ناتيجەمەن ەستە قالىپ وتىردى. ماسەلەن، ويىندار باعدارلاماسىنا العاش رەت قوسىلعان قازاق كۇرەسى مەن ارمرەستلينگتەن ۇلتتىق قۇراما سپورتشىلارى تابىستى ونەر كورسەتىپ، كوماندالىق ەسەپتە 1-ورىن الدى. سامبو مەن گرەپپلينگتەن قورجىنعا World Combat Games-تىڭ العاشقى التىنى تۇسسە، كاراتەشىلەر ءبىرىنشى رەت جۇلدەگەرلەر قاتارىنان كورىندى.

سپورت
فوتو: Kazinform

جالپى، ەل نامىسىن 10 سپورت تۇرىنەن 53 سپورتشى قورعادى.

«بۇل ويىندارعا كەيبىر سپورت تۇرلەرىنەن نەگىزگى قۇرامدى الىپ بارماساق تا، ساپاعا بارىنشا نازار اۋداردىق. ءبىز ءۇشىن ۇلتتىق سپورتىمىز - قازاق كۇرەسىنىڭ ويىندار باعدارلاماسىنا العاش رەت كىرگەنى قۋانتارلىق جايت. پالۋاندارىمىز جاقسى ناتيجە كورسەتتى. ءدال وسىلاي ارمرەستلينگكە قاتىستى ايتۋعا بولادى. ۇلتتىق قۇراما العا قويىلعان جوسپاردى ورىندادى. جارىس بارىسىندا قانداي كەمشىلىكتەر بارىن دا كوردىك. ەندى سولاردى تالداپ، باپكەرلەرمەن بىرگە وسى باعىتتا جۇمىستانامىز»، - دەدى ق ر ت س م سپورت جانە دەنە شىنىقتىرۋ ىستەرى كوميتەتىنىڭ باس مامانى كەلبەت نۇرعازينا.

وسى كورسەتكىشتىڭ ارقاسىندا قازاقستان جاۋىنگەرلىك ونەر ويىندارىنىڭ جالپى رەيتينگىسىندە 37 دەن ۇزدىك وندىققا كىردى. بۇعان دەيىن بەيجىڭ مەن سانكت-پەتەربۋرگتى قوسقاندا، قورجىنعا 1 التىن، 3 كۇمىس جانە 5 قولا تۇسكەن.

سپورت
فوتو: Kazinform

«ويىندار كەزىندە 16 سپورت ءتۇرىنىڭ ىشىندەگى ايكيدو، ارمرەستلينگ، دجيۋ-دجيتسۋ، مۋايتاي، سامبو مەن ساۆاتەدەن (فرانسۋز بوكسى) پارا-اتلەتتەر اراسىندا ارنايى جارىس ءوتتى. جەكپە-جەك ونەرىنىڭ جانكۇيەرلەرىنە باسەكەلەردى رەسمي سايتتان تىكەلەي ەفيردە كورسەتتىك. حابار تاراتۋشىلاردىڭ ارقاسىندا 100 دەن استام مەملەكەتتىڭ اۋماعىنا سيگنال تاراتتىق»، - دەدى «سپورت اككورد»، ياعني ويىندار پرەزيدەنتى يۆو فەررياني.

كەلەسى ويىندار 2025 -جىلى وتپەك. قابىلدايتىن مەملەكەت الداعى جىلدىڭ باسىندا بەلگىلى بولادى.

سپورت
فوتو: Kazinform

 

اۆتور

عايساعالي سەيتاق

سوڭعى جاڭالىقتار