بۋكمەكەرلەر سالىق ورگاندارىنا ءباس تىگۋ مالىمەتتەرىن ۇسىناتىن بولادى

Букмекерские конторы и тотализаторы обяжут передавать данные в налоговые органы
Фото: КГД МФ РК

استانا. KAZINFORM - بۋكمەكەرلەر مەن توتاليزاتورلار سالىق ورگاندارىنا ءباس تىگۋ مالىمەتتەرىن ۇسىناتىن بولادى.

وسى جىلدىڭ 12-اقپانىنان باستاپ بۋكمەكەرلەر مەن توتاليزاتورلار سالىق ورگاندارىنا ءباس تىگۋ مالىمەتتەرىن ۇسىنا باستايدى. بۇل تۋرالى مەملەكەتتىك كىرىستەر كوميتەتى ارناۋلى سالىق رەجيمدەرى باسقارماسىنىڭ باسشىسى ەرقانات شىمبەرگەن ايتتى.

«وتكەن جىلدىڭ 12-جەلتوقسانىندا سالىق كودەكسىنە ءتيىستى وزگەرتۋلەر ەنگىزىلدى. وزگەرىستەردىڭ ءبىرى - بۋكمەكەرلىك كەڭسەلەر مەن توتاليزاتورلاردىڭ مەملەكەتتىك كىرىستەر ورگاندارىنا ءباس تىگۋ تۋرالى مالىمەتتەردى ۇسىنۋ مىندەتتەمەسى. بۇل مالىمەتتەر ىقپالداستىرىلعان رەجيمدە بەرىلەدى. ياعني، سالىق ورگاندارى مەن بۋكمەكەرلىك كەڭسەلەر اراسىندا ىقپالداستىرىلعان ءوزارا ءىس- قيمىل بولادى. بۋكمەكەرلىك كەڭسەلەردە اپپاراتىق- باعدارلامالىق كەشەن بار. وندا ءباس تىگۋ، ۇتىسقا قاتىسۋشىلار تۋرالى بارلىق دەرەك تىركەلەدى. وسى دەرەكتەردىڭ ءبارى سالىقتىق اكىمشىلەۋ ماقساتىندا مەملەكەتتىك ورگاندارعا بەرىلەدى. بۇل تۇزەتۋ وسى جىلدىڭ 12-اقپانىنان باستاپ كۇشىنە ەنەدى. سودان كەيىن ىقپالداستىقتىڭ ءتيىستى ەرەجەسى، سونىمەن قاتار مەملەكەتتىك كىرىستەر ورگاندارىنا بەرىلەتىن مالىمەتتەر قۇرامى بەكىتىلەدى. جالپى، بۇل ەرەجە ىقپالداستىق ءتارتىبىن، سونداي- اق بەرىلۋى ءتيىس مالىمەتتەر قۇرامى قاراستىرىلادى»، - دەدى ول كوميتەتتە وتكەن بريفينگتە.

وسى ورايدا ول ەل تۇرعىندارىنىڭ جەكە دەرەكتەرىن مەملەكەتتىك كىرىستەر ورگاندارىنا بەرۋ قانشالىقتى زاڭدى ەكەندىگىن ايتتى.

«بۇل دەرەكتەر سالىقتىق اكىمشىلەۋ ماقساتىندا عانا پايدالانىلادى. ياعني، بۇل ج س ن تۋرالى بۇل مالىمەتتەر سالىقتىق قۇپيا سانالمايدى. ولاردىڭ قۇپيالىلىعى تيىسىنشە زاڭنامالىق اكتىلەرمەن قامتاماسىز ەتىلەدى. بۇل مالىمەتتەردى سالىق ورگاندارى عانا قولدانادى. ونى جاريا ەتكەنى ءۇشىن جاۋاپكەرشىلىك بار»، - دەدى ەرقانات شىمبەرگەن.

اۆتور

مارلان جيەمباي

سوڭعى جاڭالىقتار