ەڭبەكاقى كوپ، زەينەتاقى اۋدارىمى ەكى ەسە از - مينيستر كولەڭكەلى جۇمىس ورىندارى تۋرالى
استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قازاقستاننىڭ ەڭبەك نارىعىنداعى ءبىرقاتار وزەكتى ماسەلەنى اتادى. ماسەلەن، كاسىپكەرلىكتى دامىتۋ باعدارلامالارى سوڭعى جىلدا ايتارلىقتاي ناتيجە كورسەتكەن جوق.
«سوڭعى 5 جىل ەلىمىز ءۇشىن ايتارلىقتاي وزگەرىستەر مەن سىناقتار كەزەڭى بولدى. ءبىز ەكونوميكالىق داعدارىستى، COVID-19 پاندەمياسىن، سونداي-اق ەڭبەك نارىعىنا ايتارلىقتاي اسەر ەتكەن ءبىرقاتار ىشكى قيىندىقتاردى دا باسىمىزدان وتكەردىك. ەڭ باستىسى وسى قيىندىقتارعا قاراماستان، ءبىز ەڭبەك نارىعىندا تۇراقتىلىقتى ساقتاي الدىق»، - دەپ اتاپ ءوتتى مينيستر ماجىلىستە «قازاقستاننىڭ ەڭبەك نارىعىن دامىتۋ جانە كادرلىق الەۋەتىن نىعايتۋ» اتتى ۇكىمەت ساعاتىندا.
ونىڭ ايتۋىنشا، قازاقستاننىڭ ەڭبەك نارىعىنىڭ تۇراقتى وسۋىنە قاراماستان، مەملەكەتتىڭ تەڭ مۇمكىندىكتەردى قامتاماسىز ەتىپ، ءومىر ءسۇرۋ ساپاسىن ارتتىرۋى ءۇشىن ودان ءارى كۇش سالۋدى تالاپ ەتەتىن ءبىرقاتار وسال تۇستار انىقتالعان.
«ءبىرىنشىسى - ەڭبەك نارىعىندا ۇسىنىستاردى جاساۋ. ماسەلەن، مەملەكەت كاسىپكەرلىكتى دامىتۋعا جانە يندۋستريالاندىرۋعا باعىتتالعان باعدارلامالاردى ىسكە اسىرۋدا. الايدا، سوڭعى 10 جىلعى ستاتيستيكا كورسەتكەندەي، بۇل باعدارلامالاردىڭ اسەرى جەتكىلىكسىز. دەگەنمەن، مەملەكەتتىڭ ەكونوميكانى ىنتالاندىرۋ بويىنشا قابىلداعان بەلسەندى شارالارىنا قاراماستان، جەكە بيزنەستىڭ جاڭا جۇمىس ورىندارىن قۇرۋعا قوسقان ۇلەسى شامامەن 20 پايىزدى عانا قۇرايدى. بۇل ەكونوميكالىق ىنتىماقتاستىق پەن دامۋ ۇيىمى ەلدەرىمەن سالىستىرعاندا 4 ەسە از»، - دەدى س. جاقىپوۆا.
تيىسىنشە، بۇگىندە جۇمىس ورىندارىنىڭ ءوسىمىن ونىمدىلىگى تومەن سالالار مەن مەملەكەتتىك سەكتور قامتاماسىز ەتۋدە. بۇل پروتسەستىڭ جاناما سالدارى - قازاقستاننىڭ ە ى د ۇ ەلدەرىنەن ەڭبەك ونىمدىلىگى بويىنشا ءۇش ەسە ارتتا قالعانى.
«ەكىنشى سىن- قاتەر - فورمالدى ەمەس جۇمىسپەن قامتۋدىڭ جوعارى دەڭگەيى. 2023 -جىلى ناقتى زەينەتاقى اۋدارىمدارىنىڭ دەرەكتەرى بويىنشا ەسەپتەلگەن ەڭبەكاقى تولەۋ قورىنىڭ كولەمى 20 تريلليون تەڭگەنى قۇرادى. ءوز كەزەگىندە، ۇلتتىق ستاتيستيكا بيۋروسىنىڭ باعالاۋىنشا ەڭبەكاقى تولەۋ قورى ەكى ەسە كوپ - 38 تريلليون تەڭگە. ەڭبەكاقى قورى بويىنشا دەرەكتەردىڭ ەداۋىر الشاقتىعى ساۋدا، اۋىل شارۋاشىلىعى جانە جىلجىمايتىن مۇلىك سەكتورلارىندا بايقالادى. مينيسترلىكتىڭ اي سايىنعى دەرەكقور مونيتورينگى ۇلتتىق جوبالار شەڭبەرىندە جۇمىسقا ورنالاستىرىلعان ءاربىر ءتورتىنشى ادامنىڭ مىندەتتى زەينەتاقى جارنالارى جوق ەكەنىن كورسەتىپ وتىر»، - دەدى ەڭبەك ءمينيسترى.
سونىمەن بىرگە، ەكونوميكانىڭ ورتا كاسىپتىك ءبىلىمى بار كادرلارعا قاجەتتىلىگى ارتىپ كەلەدى. بۇل رەتتە بيزنەس تاراپىنان سۇرانىس پەن جۇمىس كۇشىنە ۇسىنىس اراسىنداعى سايكەسسىزدىك بايقالىپ وتىر.
«كاسىپتىك- تەحنيكالىق ءبىلىمى بار ماماندارعا سۇرانىس جوعارى ءبىلىمى بار تۇلەكتەرگە قاجەتتىلىكتەن %70 ارتىق. بىلىكتىلىگى ورتاشا جانە جوعارى دەڭگەيدەگى جۇمىس كۇشىنە ۇسىنىس كولەمى بىردەي بولىپ قالۋدا»، - دەدى س. جاقىپوۆا.
