ەڭبەك كوشى-قونى: قازاقستاننان قونىس اۋداراتىندار نەگىزىنەن قاي ەلدەردى تاڭدايدى
استانا. KAZINFORM - قازاقستاننان شەتەلگە قونىس اۋداراتىن ازاماتتار كوبىنە ت م د مەن باتىس ەلدەرىن تاڭدايدى. وسى جانە وزگە دە ستاتيستيكالىق دەرەكتەرگە شولۋ ۇسىنامىز.
قونىس اۋدارعاندار سانى
بۇل ءۇردىستىڭ جەتەكشى سەبەپتەرىنىڭ ءبىرى - ازاماتتار شەتەلدە جۇمىس ىستەۋگە كەتەدى. سونىمەن قاتار، ءبىلىم الۋ مەن حالىقارالىق تاجىريبە جيناقتاۋ ءۇشىن شەتەلگە كەتەتىن جاستار دا بار.
ۇلتتىق ستاتيستيكا بيۋروسىنىڭ 2024 -جىلعى زەرتتەۋلەرىنە كوز جۇگىرتىپ، سوڭعى ۋاقىتتا شەتەلگە كوشكەن ادام سانى - 12784 ەكەنىن كورۋگە بولادى. ونىڭ ىشىندە قازاقتار - 795، ۋكرايندىقتار - 704، وزبەكتەر - 1672 جانە باسىم بولىگى ورىس ۇلتى - 7886. ەلدەن كوشۋگە شەشىم قابىلداعاندار كوبىنەسە ت م د مەملەكەتتەرىن تاڭدايدى. سونداي-اق، گەرمانيا، پولشا جانە ا ق ش سياقتى باتىس ەلدەرىنە قونىس اۋدارۋدى ءجون كورەدى.
سونىمەن قاتار، 2024 -جىلعى مالىمەتتەر بويىنشا، ەلگە كوشىپ كەلگەندەردىڭ سانى - 29948 ادام.
شەتەلگە كەتەتىن ماماندار
ەلدەن كوشكەن قازاقستاندىقتاردىڭ اراسىندا تەحنيكالىق ماماندىقتار مەن ەكونوميكا سالاسىنىڭ ماماندارى باسىم. ستاتيستيكاعا سايكەس، قونىس اۋدارعان قازاقستاندىقتاردىڭ 3113 ى تەحنيكالىق ماماندىقتار بويىنشا جۇمىس ىستەۋگە كەتسە، 1293 ادام ەكونوميكا سالاسىن تاڭداعان. ودان كەيىنگى ورىنداردى پەداگوگتەر - 994، زاڭگەرلەر - 357 جانە مەديتسينا سالاسىنىڭ وكىلدەرى - 575 الادى. سونداي-اق، شەتەلدە ءوز ماماندىعى بويىنشا جۇمىس ىستەپ جۇرگەن ساۋلەتشى، اۋىلشارۋاشىلىعى جانە باسقا سالالاردىڭ ماماندارى دا از ەمەس.
پايداسى مەن زيانى
ءبىر جاعىنان، بۇل - سىرتقى جۇمىس كۇشىن ارتتىرىپ، شەتەلدە جۇرگەن قازاقستاندىقتاردىڭ تاجىريبە جيناقتاپ قايتۋىنا مۇمكىنشىلىك. تەك بۇل عانا ەمەس، شەتەلدە ءبىلىم الىپ، جۇمىس ىستەپ جاتقان ازاماتتار ەلگە جاڭا ءبىلىم، تەحنولوگيالار مەن ينۆەستيسيالار اكەلۋى ىقتيمال. بۇل تۇرعىدا شەتەلگە كەتۋ تەك تەرىس ەمەس، جەكە دامۋ مەن جاڭا مۇمكىندىكتەردىڭ جولى سانالادى.
الايدا، ەگەر بۇل ءۇردىس توقتاماسا، ەلىمىزدە بىلىكتى ماماندار تاپشىلىعى كۇشەيىپ، ەكونوميكا مەن عىلىمدا ارتتا قالۋ قاۋپى تۋىنداۋى مۇمكىن. بۇل جاعدايدا، مەملەكەت ىشكى ەڭبەك نارىعىن جاقسارتۋعا، جاستارعا كاسىبي ءوسۋ مۇمكىندىكتەرىن ۇسىنۋعا، جۇمىس ورىندارىن كوبەيتۋگە باعىتتالعان شارالاردى قولعا الۋى قاجەت.
اقشا اۋدارىمدارى
وزگە ەلگە كوشكەن ازاماتتاردىڭ قازاقستانعا جاساعان قاراجات اۋدارىمدارى ەكونوميكاعا ايتارلىقتاي اسەر ەتەدى. مىسالى، وسى جىلدىڭ قاڭتار ايىندا قازاقستاننان شەتەلدەرگە اۋدارىلعان اقشا - 40,7 ميلليارد تەڭگە. بۇل - 2024 -جىلدىڭ جەلتوقسانىمەن سالىستىرعاندا 28,3 پايىزعا از. ال اقپان ايىندا اۋدارىمدار كولەمى 45 ميلليارد تەڭگەگە جەتكەن. قاڭتارمەن سالىستىرعاندا 10,5 پايىزعا ارتىپ وتىر. سونىمەن قاتار، قاڭتار- اقپان ايلارىندا شەتەلدەن قازاقستانعا جاسالعان اۋدارىمداردىڭ جالپى سوماسى - 31,6 ميلليارد تەڭگە.
2025 -جىلدىڭ العاشقى ەكى ايىندا قازاقستاننان شەتەلگە جاسالعان اقشا اۋدارىمدارى كولەمى شەتەلدەن قازاقستانعا كەلگەن اۋدارىمداردان شامامەن ءۇش ەسە كوپ بولدى. بۇل ەڭبەك ميگراتسياسى، وتباسىلىق قولداۋ جانە ينۆەستيتسيالىق ماقساتتارمەن بايلانىستى بولۋى مۇمكىن. سونىمەن قاتار، ۆاليۋتا قۇرىلىمىنداعى ايىرماشىلىقتار دا نازار اۋدارارلىق: شەتەلگە اۋدارىمداردا تەڭگەنىڭ ۇلەسى جوعارى بولسا، قازاقستانعا كەلگەن اۋدارىمداردا دوللار باسىم.
ايتا كەتەيىك، بۇعان دەيىن قازاقستاندا دەموگرافيا جانە كوشى-قون سالاسىن رەتتەيتىن مەملەكەتتىك ورگان قۇرۋ ۇسىنىلعانىن حابارلاعانبىز.
اۆتور
گۇلنۇر عازيز قىزى
