ەڭبەك دەمالىسىنا قاي ايدا شىقساڭىز، كوپ اقشا الاسىز؟

وندىرىستىك كۇنتىزبەگە سۇيەنسەك، بيىل قازاقستاندا 246 جۇمىس كۇنى بار. زاڭگەر سابيرا ساليموۆا 2025 -جىلى قاي ايدا دەمالىسقا شىعۋ ءتيىمدى ەكەنىن ايتتى.

ايتۋىنشا، نەعۇرلىم جۇمىس كۇنى كوپ ايلاردا دەمالىسقا شىقساڭىز، سوعۇرلىم الاتىن ەڭبەكاقىڭىز دا كوبىرەك بولادى.

دەمالىسقا شىعاردا جۇمىس كۇنى كوپ، مەرەكەسى از، ءتىپتى مەرەكەلىك كۇندەر جوق ايدى تاڭداساڭىز، الاتىن اقشاڭىز دا كوبىرەك شىعادى. بيىل دەمالىسىڭىزدى ءساۋىر، شىلدە، قازان جانە جەلتوقسان ايلارىنا جوسپارلاۋعا كەڭەس بەرەمىن. بۇل ايلاردا ەڭ كوپ جۇمىس كۇنى، ياعني ءارقايسىسىندا 22 جۇمىس كۇنى بار. وسى ايلاردى تاڭداۋ دەمالىس كۇندەرىنىڭ مولشەرىنە وڭ اسەر ەتەدى، - دەپ اتاپ ءوتتى زاڭگەر.

سونداي-اق تامىز جانە قىركۇيەك ايلارىندا دەمالساڭىز دا ەڭبەكاقىدان ۇتىلمايسىز.

بۇل ايلاردا 21 جۇمىس كۇنى بولعاندىقتان سايكەسىنشە، تولەم دە كوبىرەك شىعادى. ءبىر ايدا جۇمىس كۇندەرىنىڭ كوپ بولۋى تولەمدى ەسەپتەگەندە ەسكەرىلەدى. سەبەبى تولەمدى ەسەپتەگەندە جۇمىس ىستەگەن ساعاتتاردىڭ سانى ەسەپكە الىناتىندىقتان تولەماقىڭىزدىڭ دا سوماسى ارتا تۇسەدى، - دەيدى سابيرا ساليموۆا.

ياعني ەسەپتەۋ بازاسى ءبىر اي ىشىندەگى جۇمىس كۇندەرىنىڭ سانىنا تىكەلەي بايلانىستى بولاتىن ورتاشا كۇندىك تابىس نەگىزىندە جاتىر. سونداي كۇندەر كوپ بولعان سايىن دەمالىسقا تولەنەتىن اقىڭىزدىڭ دا مولشەرى ارتا تۇسەدى.

ال دەمالىس ءۇشىن ءتيىمسىز ايلار: ناۋرىز، مامىر جانە ماۋسىم. ناۋرىزدا نەبارى 17 جۇمىس كۇنى بولسا، مامىردا 19 جۇمىس كۇنى بار. بۇل ايدا سايكەسىنشە، وتەماقى دا ازىراق شىعادى. ماۋسىمدا 20 جۇمىس كۇنى بولعاندىقتان دەمالىس اقىڭىز ازايادى.

جۇمىس كۇندەرىن وندىرىستىك كۇنتىزبەدەن قاراۋعا بولادى.