بۇدان 100 جىل بۇرىن قىزىلوردا استانا اتانعاندا قالا حالقىنىڭ سانى قانشا ەدى
قىزىلوردا. KAZINFORM - قىزىلوردا قازاق ا ك س ر-نىڭ استاناسى بولعان ۋاقىتتا قالا قارقىندى دامىدى. قونىستانۋشىلار كوبەيىپ، وقۋ، ءوندىرىس ورىندارى مەن مەكەمەلەر سانى ارتتى.
قورقىت اتا اتىنداعى قىزىلوردا ۋنيۆەرسيتەتى گۋمانيتارلىق- پەداگوگيكالىق ينستيتۋتىنىڭ ديرەكتورى، تاريح عىلىمدارىنىڭ كانديداتى ساعات تايمان رەسپۋبليكانىڭ اكىمشىلىك ورتالىعى بولعان كەزدەگى قالا ومىرىندەگى وزگەرىستەرگە توقتالدى.
- قالا تۇرعىندارىنىڭ سانى 22,5 مىڭنان استى. قالاعا ەلەكتر جارىعى قوسىلىپ، وسىندا ءتۇرلى مەكەمەلەر مەن ءوندىرىس ورىندارىنىڭ ىرگەتاسى قالانا باستادى. كونديتەرلىك فابريكا، ەت كومبيناتتارى، سىرا زاۋىتى، سونىمەن قاتار ءتۇرلى ارتەلدەر كوبەيدى. ورتا جانە ارناۋلى وقۋ ورىندارى، ونەركاسىپ جانە اۋىل شارۋاشىلىعى مەكەمەلەرى، قازاق ەپيدەميولوگيا جانە گيگيەنا ينستيتۋتى نەگىزىندە ەگۋ لابوراتورياسى دۇنيەگە كەلدى، - دەدى عالىم.
1925-1928 -جىلدارى قىزىلوردادا بولعان قازاق حالىق اعارتۋ ينستيتۋتىندا ا. بايتۇرسىن ۇلى ءدارىس وقىدى.
تۇڭعىش قازاق عىلىمي-زەرتتەۋ، جەر قىرتىسىن زەرتتەۋ، مال دارىگەرلىك-باكتەريولوگيالىق ينستيتۋتتارى جۇمىسىن باستادى.
سىر بويىنداعى باس شاھاردا سونىمەن قاتار كوپتەگەن اقپارات قۇرالى شوعىرلاندى.
رەسپۋبليكالىق «ەڭبەكشى قازاق» (قازىرگى «ەگەمەن قازاقستان»)، «سوۆەتسكايا ستەپ» (قازىرگى «كازاحستانسكايا پراۆدا»)، «اۋىل» گازەتتەرى مەن «ايەل تەڭدىگى»، «دەنساۋلىق جولى»، «جاڭا ادەبيەت»، «جاڭا مەكتەپ» جۋرنالدارى جارىق كوردى.
تۇڭعىش تەاتر شىمىلدىعى قىزىلوردا قالاسىندا 1926 -جىلى 13-قاڭتاردا م. اۋەزوۆتىڭ «ەڭلىك-كەبەك» پەساسىمەن جانە حالىق ونەرپازدارى قاتىسقان ۇلكەن كونسەرتپەن اشىلدى.
- ساز بالشىقتان سالىنعان ءۇي-جايلاردىڭ ورنىندا قوس قاباتتى ۇيلەر ساپ تۇزەدى. سول كەزدەگى مولشەرمەن قۇرىلىسقا قىرۋار قارجى بولىنگەن. 1925 -جىلى ورىنبوردان جاڭا استاناعا 49 مەكەمە مەن 1150 قىزمەتكەردى كوشىرۋ قاجەت بولدى. كوشىرۋ كوميسسياسىن ورنالاستىرۋ ءۇشىن ءارتۇرلى نىسانداردى، ءتىپتى سارايلاردى، جازعى اسحانالار مەن مونشالاردى بەيىمدەۋگە تۋرا كەلدى، - دەيدى ول.
ەسكە سالساق، قىزىلوردا قالاسى تۋرا ءبىر عاسىر بۇرىن قازاق ا ك س ر-نىڭ استاناسى بولدى. بۇگىندە قالا تۇرعىندارىنىڭ سانى سول كەزدەگىدەن الدەنەشە ەسە ءوسىپ، 280 مىڭنان استى.
قىزىلورداداعى كەيبىر عيماراتتار قالا قازاق رەسپۋبليكاسىنىڭ استاناسى بولعان كەزەڭنىڭ سارقىتىنداي ساقتاۋلى تۇر. سونىڭ ءبىرى - قۇتقارۋشى حريستوس شىركەۋى تۋرالى جاقىندا جازعانبىز.
اۆتور
نازەركە سانيازوۆا
