«بايقوڭىردىڭ» ءبىرقاتار تۋريستىك نىسانى قازاقستانعا قايتارىلماق

استانا. KAZINFORM - «بايقوڭىر» كەشەنىندە تۋريزمدى دامىتۋ تۇجىرىمداماسى ازىرلەنىپ جاتىر. بۇل جايىندا ءماجىلىس دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.

- «بايقوڭىر» كەشەنىنىڭ تۋريستىك الەۋەتىنە ەرەكشە نازار اۋدارىلادى. ونى كەڭەيتۋ ءۇشىن «Kazakh Tourism» ا ق «بايقوڭىر» كەشەنىندە تۋريزمدى دامىتۋ تۇجىرىمداماسىن ازىرلەۋ بويىنشا جۇمىستار جۇرگىزىلىپ جاتىر. سونداي-اق 2024 -جىلدىڭ قاراشا ايىندا «سويۋز» زىمىراندارىنىڭ ۇشىرىلۋىن باقىلاۋ ءۇشىن كيىز ءۇي ورناتىلىپ، ۇلتتىق ستيلدە بەزەندىرىلگەن «QAZQOSMOS» باقىلاۋ پۋنكتى سالىندى، - دەدى ۇكىمەت باسشىسى جاۋابىندا.

ونىڭ اتاپ وتۋىنشە، بۇدان باسقا عارىش ايلاعىنىڭ ءبىرقاتار تارتىمدى تۋريستىك نىسانىن («نولدىك كۆارتال»، «گاگاريندىك بەسەدكا» (10-الاڭ)، «كوتتەدجدەر» قوناقۇيلەرى (2ج- الاڭ)، مونتاجداۋ- جانارماي قۇيۋ كەشەنى (112ا- الاڭ)، ديناميكالىق سىناقتار ستەندى (112د- الاڭ) جالعا الۋ جانە قازاقستان تارابىنا قايتارۋ جۇمىسى جۇرگىزىلىپ جاتىر.

- 2025 -جىلدىڭ ءبىرىنشى جارتىجىلدىعىنىڭ سوڭىنا دەيىن «گاگاريندىك ستارت» نىسان جالعا الۋ بويىنشا جۇمىستاردى اياقتاۋ جوسپارلانعان. «ينفراكوس» ر م ك قازاقستاندىق جانە رەسەيلىك تۋروپەراتورلارمەن قىزمەت كورسەتۋ شارتتارى جاسالدى. «GEORARK АRAL» قوعامدىق قورىمەن مەموراندۋمعا جانە «Kazakh Tourism» ا ق مەن «BSL consulting» ج ش س- مەن ىنتىماقتاستىق تۋرالى ءۇشجاقتى كەلىسىمگە قول قويىلدى. بۇعان قوسا، «بايتەرەك» ب ك» ا ق عارىش زىمىران كەشەنىن قوسا العاندا، كاسىپورىننىڭ نەگىزگى نىساندارىن قامتيتىن ەكسكۋرسيالىق باعدارلامالاردى بەكىتتى، - دەدى ولجاس بەكتەنوۆ.

ايتا كەتەيىك، مەملەكەت باسشىسى قاسىم-جومارت توقايەۆ «بايقوڭىر» عارىش ايلاعىنىڭ قۇرىلعانىنا 70 جىل تولۋىنا وراي ۆيدەوۇندەۋ جولدادى.

اۆتور

مارلان جيەمباي