بايقوڭىردىڭ 70 جىلدىعى قالاي تويلاندى؟
قىزىلوردا. KAZINFORM - بۇگىن قىزىلوردا وبلىسىندا «بايقوڭىر» عارىش ايلاعى مەن قالاسىنىڭ 70 جىلدىعى كەڭ كولەمدە تويلانىپ جاتىر. بۇل تۋرالى قازاقستان رەسپۋبليكاسى پرەزيدەنتىنىڭ بايقوڭىر كەشەنىندەگى وكىلدىگى حابارلادى.
مەرەيتوي جۇلدىزدى قالاشىقتا ورنالاسقان گ. شۋبنيكوۆ اتىنداعى ساياباقتاعى «قالا مەن بايقوڭىر عارىش ايلاعىنا 65 جىل» ەسكەرتكىشىندە وتكەن ميتينگىدەن باستالدى. سالتاناتتى ءىس-شارادا قازاقستان رەسپۋبليكاسى پرەزيدەنتىنىڭ بايقوڭىر كەشەنىندەگى ارناۋلى وكىلى ق. نۇرتاي، «روس كوسموس» م ك باس ديرەكتورى د. باكانوۆ جانە بايقوڭىر قالاسى اكىمشىلىگىنىڭ باسشىسى ك. بۋسىگين ءسوز سويلەدى. ولار بايقوڭىردىڭ نەگىزىن قالاعان ارداگەرلەرگە العىس ءبىلدىرىپ، ەكى ەل ءۇشىن عارىش ايلاعىنىڭ ماڭىزدىلىعىن اتاپ ءوتتى.
ودان كەيىن قالا تۇرعىندارى مەن قوناقتارى اشىق اسپان استىندا مۋزەيدىڭ رەسمي اشىلۋ راسىمىنە كۋا بولدى.
- مۋزەي «بايقوڭىر» عارىش ايلاعىنىڭ باي مۇراسىن، تەحنيكالىق جەتىستىكتەرىن جانە دامۋ تاريحىن پاش ەتەدى. مۇندا عارىشتىق تەحنيكا ۇلگىلەرى، زىمىراندار، جەرۇستى جابدىقتار مەن تاريحي نىساندار قويىلعان. بۇل - كەلۋشىلەرگە وتاندىق جانە الەمدىك عارىش تاريحىن كورنەكى تۇردە ۇسىناتىن بىرەگەي ورىن، - دەلىنگەن حابارلامادا.
مەرەكەلىك ءىس-شارالار ءتۇس اۋا قالاداعى «ساتۋرن» مادەنيەت جانە كينو زالىندا جالعاستى. وندا قازاقستان مەن رەسەي باسشىلارىنىڭ بەينەقۇتتىقتاۋى كورسەتىلدى. سونىمەن قاتار قازاقستان رەسپۋبليكاسى پرەزيدەنتىنىڭ بايقوڭىر كەشەنىندەگى ارناۋلى وكىلى ق. نۇرتاي، ق ر س د ي ا و م ايەروعارىش كوميتەتىنىڭ ءتوراعاسى ب. ورالماعامبەتوۆ، «روسكوسموس» باس ديرەكتورى د. باكانوۆ جانە بايقوڭىر قالاسى اكىمشىلىگىنىڭ باسشىسى ك. بۋسىگين جينالعانداردى قۇتتىقتاپ، ارنايى ماراپاتتار تابىس ەتتى. بايقوڭىر كەشەنىندە ۇزاق جىل ەڭبەك ەتكەن ازاماتتارعا «قىزىلوردا وبلىسىنىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن»، «عارىش سالاسىن دامىتۋعا قوسقان ۇلەسى ءۇشىن» ۆەدومستۆولىق مەدالدارى تابىس ەتىلدى.
رەسمي جيىن ونەرپازداردىڭ كونسەرتىنە ۇلاستى.
مەرەكەلىك ءىس-شارالار قالالىق ستاديوندا قورىتىندىلانادى. وعان ق ر پرەمەر-ءمينيسترىنىڭ ءبىرىنشى ورىنباسارى ر. سكليار قاتىسادى دەپ جوسپارلانىپ وتىر. وسى كەشتە عارىش سالاسىندا ۇزاق جىل ەڭبەك ەتكەن وزاتتارعا مەملەكەتتىك ناگرادالار، قوعامدىق-ساياسي جانە الەۋمەتتىك-ەكونوميكالىق سالادا ەرەن ەڭبەك سىڭىرگەن 16 ادامعا «بايقوڭىر قالاسىنىڭ قۇرمەتتى ازاماتى» اتاعى تابىستالماق.
ودان كەيىن وتاندىق ەسترادا جۇلدىزدارى ونەر كورسەتىپ، سالتاناتتى وتشاشۋ بولادى.
بۇعان دەيىن ءبىز بايقوڭىردىڭ مەرەيتويىن اۋماعىندا الەمدەگى تۇڭعىش عارىش ايلاعى ورنالاسقان قازاقستان قالاي وتكىزەتىنى تۋرالى «بايقوڭىر» ايەروعارىش كوميتەتىنىڭ (قازعارىش) جەر ءۇستى عارىشتىق ينفراقۇرىلىم كەشەنى باسقارماسىنىڭ باسشىسى امانگەلدى بەكىشيەۆتەن سۇراپ ءبىلىپ، جاريالاعان ەدىك.
اۆتور
نازەركە سانيازوۆا
