باياناۋىلدا ۇلتتىق پارككە قاراستى جەرلەر ورتەنىپ جاتىر

پاۆلودار. KAZINFORM - ءتىلسىز جاۋدى سوندىرۋگە وڭىرلىك توتەنشە جاعدايلار، ورمان شارۋاشىلىعى قىزمەتتەرى، قازاۆيا ورمان قورعاۋ جانە جاسىباي ورمانشىلىعى كۇشتەرى مەن قۇرالدارى جۇمىلدىرىلعان.

باياناۋىل اۋدانىنداعى جاسىباي ورمانشىلىعىندا ءورت تۇتانىپ، بوي بەرمەي جاتىر. ءورت سوندىرۋشىلەر ەكپىندى جەل مەن قۇرعاپ تۇرعان وسىمدىكتەر جالىننىڭ تەز تارالۋىنا سەبەپ بولىپ وتىر دەيدى. جەرگىلىكتى تۇرعىندار تۇسىرگەن بەينەجازبالاردان بايقالعانداي، ءورت جاسىباي دەمالىس ايماعىندا، تاۋداعى قاراعاي توعايلارىنا تارالا باستاعان.

- 4- ساۋىردە 112 پۋلتىنە باياناۋىل اۋدانىنىڭ جاسىباي ورمانشىلىعىندا قۇرعاق ءشوپتىڭ ورتەنگەنى تۋرالى حابارلاما كەلىپ ءتۇستى. ءورتتى سوندىرۋگە توتەنشە جاعدايلار دەپارتامەنتى، ورمان شارۋاشىلىعى، قازاۆياورمانقورعاۋ جانە جاسىباي ورمانشىلىعى دەپارتامەنتىنىڭ كۇشتەرى مەن قۇرالدارى دەرەۋ كىرىستى. قازىرگى ۋاقىتتا ءورتتى جويۋعا 70-كە جۋىق ادام جانە 20-دان استام تەحنيكا جۇمىلدىرىلدى. ەكپىندى جەل مەن قۇرعاق ءشوپ جاعدايدى قيىنداتىپ تۇر. جاعداي ەرەكشە باقىلاۋدا، - دەپ حابارلادى وڭىرلىك توتەنشە جاعدايلار دەپارتامەنتىنەن.

وقيعا ورنىنا پاۆلودار وبلىسى توتەنشە جاعدايلار دەپارتامەنتى باسشىلىعى، سونداي-اق اكىمدىك وكىلدەرى كەلدى. توتەنشە جاعدايلار مينيسترلىگى جانە وبلىستىق توتەنشە جاعدايلار دەپارتامەنتىنىڭ كوماندالىق ورتالىعىندا جەدەل شتاب قۇرىلدى. ءورت ورنىنا قوسىمشا قۇرامىندا وڭىرلىك توتەنشە جاعدايلار دەپارتامەنتىنىڭ 38 قىزمەتكەرى مەن 11 تەحنيكا بار كولوننا جىبەرىلگەن.

ەسكە سالا كەتەيىك، بىلتىر كۇزدە باياناۋىلدا جەر ورتەنىپ، ءبىر اۋىلدىڭ تۇرعىندارى قاۋىپسىز اۋماققا كوشىرىلگەن بولاتىن.

كەيىنىرەك، ءورت شالعان جەرلەردىڭ اۋماعى 10 مىڭ گەكتارعا جەتكەنى انىقتالدى.

اۆتور

مۇرات اياعان