باياناۋىلدا ءورت شالعان جەرلەردىڭ اۋماعى 10 مىڭ گەكتارعا جەتكەن

پاۆلودار. KAZINFORM - بۇگىن ساعات 14.30 دا پاۆلودار وبلىسى، باياناۋىل اۋدانى اۋماعىندا جالپى اۋدانى 10 مىڭ گەكتار بولاتىن دالا ءورتى وقشاۋلانعان. ءتىلسىز جاۋدىڭ بەتىن قايتارۋعا 236 ادام، 42 تەحنيكا، 2 اۋە كەمەسى، 3 ۇشقىشسىز ۇشۋ اپپاراتى جۇمىلدىرىلعان.

بۇل تۋرالى ق ر توتەنشە جاعدايلار مينيسترلىگىنىڭ باسپا ءسوز قىزمەتىنەن حابارلادى.

- ءورتتى سوندىرۋگە پاۆلودار وبلىسى، استانا قالاسى توتەنشە جاعداي دەپارتامەنتتەرىنىڭ، سونداي-اق اباي وبلىسىنان جانە ق ر ت ج م 68303 اسكەري ءبولىمىنىڭ قۇتقارۋشى توپتارى، ورمان شارۋاشىلىعى قىزمەتتەرى جانە جەرگىلىكتى اتقارۋشى ورگانداردان ەرىكتى ءورت ءسوندىرۋ قۇرالىمدارى قاتىستى. وقشاۋلاۋعا 236 ادام، 42 تەحنيكا، 2 اۋە كەمەسى، 3 ۇشقىشسىز ۇشۋ اپپاراتى جۇمىلدىرىلدى. بارلىعى 64 توننا سۋ توگىلدى. سۋ شالقاركول كولىنەن جانە جەلتاۋ كەنتىندەگى ۇڭعىمادان الىندى. قازىرگى ۋاقىتتا جەرگىلىكتى ءورت وشاقتارىن جويۋ جۇمىستارى جۇرگىزىلىپ جاتىر، - دەپ مالىمدەدى مينيسترلىكتەن.

بۇگىن تاڭەرتەڭ پاۆلودار وبلىسىنىڭ اكىمى اسايىن بايحانوۆ باياناۋىلداعى ءورتتىڭ جولى بوگەلىپ، بارلىعى 6 مىڭ گەكتار دالا ءورتى وقشاۋلاندى دەپ حابار بەرگەن.

ال ق ر توتەنشە جاعدايلار مينيسترلىگىنىڭ ۇسىنعان مالىمەتى ءوڭىر باسشىسى ۇسىنعان سيفرلاردان 4 مىڭ گەكتارعا كوپ. سوعان قاراعاندا باياناۋىلدا بۇگىن تاڭەرتەڭنەڭ بەرى دالا ءورتىنىڭ اۋماعى ۇلعايا تۇسكەنى بايقالادى. ماماندار ءورتتىڭ قاشان تولىق جويىلاتىنىن ايتا الماي وتىر.

ەسكە سالا كەتەيىك، 6-قازان كۇنى باياناۋىلدا جەر ورتەنىپ، ءبىر اۋىلدىڭ تۇرعىندارى قاۋىپسىز اۋماققا كوشىرىلدى.

ءورت شالعان جەرگە جاقىن ورنالاسقان جۇمات شانين اۋىلىنا قاۋىپ ءتونىپ تۇرعان جوق.

تىكۇشاقتار پاۆلودار مەن قاراعاندى شەكاراسىنداعى ءورت وشاقتارىنا 22 توننا سۋ توكتى.