باياناۋىلعا ەرەكشە مارتەبە قاشان بەرىلەدى - ۇكىمەت باسشىسىنىڭ جاۋابى

استانا. KAZINFORM - پرەمەر- مينيستر ولجاس بەكتەنوۆ ءماجىلىس دەپۋتاتتارىنىڭ باياناۋىلعا بىرەگەي تاريحي، عىلىمي جانە تۋريستىك الەۋەتى بار اۋماق رەتىندە ەرەكشە مارتەبە بەرۋگە قاتىستى ساۋالىنا جاۋاپ بەردى.

ۇكىمەت باسشىسىنىڭ اتاپ وتۋىنشە، قازىرگى ۋاقىتتا قولدانىستاعى زاڭنامادا «عىلىمدى قاجەتسىنەتىن اۋماق» تۇسىنىگى مەن انىقتاماسى قاراستىرىلماعان. قازاقستاندا عىلىمدى قاجەتسىنەتىن اۋماقتار قۇرۋمەن بايلانىستى ماسەلەلەردى شەشۋ ماقساتىندا ءماجىلىس دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە عىلىمدى قاجەتسىنەتىن اۋماقتار ماسەلەلەرى بويىنشا وزگەرتۋلەر مەن تولىقتىرۋلار ەنگىزۋ تۋرالى» ق ر زاڭى جوباسىنا باستاماشىلىق جاساعان.

- زاڭ جوباسى «عىلىمدى قاجەتسىنەتىن اۋماق» تۇسىنىگىن ەنگىزۋدى، ونىڭ ىشىندە جەرگىلىكتى اتقارۋشى ورگانداردىڭ عىلىمدى قاجەتسىنەتىن اۋماقتاردى دامىتۋدىڭ كەشەندى جوسپارىن ازىرلەۋىن، كەلىسۋىن جانە بەكىتۋىن، سونىمەن قاتار وكىلەتتى ورگانعا ەلدى مەكەنگە عىلىمدى قاجەتسىنەتىن اۋماق مارتەبەسىن بەرۋدى ۇسىنۋىن، جوعارى عىلىمي-تەحنيكالىق كوميسسيادا اتالعان عىلىمدى قاجەتسىنەتىن اۋماق ءۇشىن باسىم عىلىمي باعىتتاردى ايقىنداۋىن كوزدەيدى. ۇكىمەتتىڭ زاڭ جوباسىنا قورىتىندىسى ماجىلىسكە ەنگىزىلدى. جوعارىدا ايتىلعاندى ەسكەرە وتىرىپ، باياناۋىل اۋدان ورتالىعىنا عىلىمدى قاجەتسىنەتىن اۋماق مارتەبەسىن بەرۋ ماسەلەسى ءتيىستى زاڭ جوباسى قابىلدانعاننان كەيىن عانا قارساستىرۋ مۇمكىن بولادى دەپ ەسەپتەيمىن، - دەدى پرەمەر- مينيستر.

ايتا كەتەيىك، باياناۋىلعا بىرەگەي تاريحي، عىلىمي جانە تۋريستىك الەۋەتى بار اۋماق رەتىندە ەرەكشە مارتەبە بەرۋ كەرەك. بۇل تۋرالى پرەمەر-مينيسترگە ساۋال جولداعان ءماجىلىس دەپۋتاتى نيكولاي ارسيۋتين ايتتى.