باياناۋىل ۇلتتىق پاركىندە بۇلان كوبەيە تۇسكەن
باياناۋىل مەملەكەتتىك ۇلتتىق تابيعي پاركىندە بۇلان سانى 80 گە جۋىقتاپ قالدى، دەپ حابارلايدى Kazinform.
ۇلتتىق پارك اۋماعىندا قامىستى، قوعالى جەرلەردىڭ كوپ بولۋى تۇياقتى جانۋاردىڭ اۋماقتا تۇراقتاپ قالۋىنا سەبەپ بولىپ وتىر.
بۇلان نەگىزى بۇعى تەكتەس سۇتقورەكتى جانۋار بولعانىمەن، تۇرقى جاعىنان تۇيەگە جاقىن، تۇياعى ايىر كەلەدى. قازاقستاندى مەكەندەيتىن سۇتقورەكتىلەردىڭ ىشىندەگى ەڭ ءىرىسى. انالىعى كوپ جەرلەردە قانداعاي دەپ اتالادى. قانداعايدىڭ ەڭ ىرىلەرىنىڭ بيىكتىگى 2,4 مەترگە، تۇمسىعىنان قۇيرىعىنا دەيىنگى تۇرقى 3 مەترگە، سالماعى 620 كيلوگرامعا دەيىن جەتەدى.
رەسمي دەرەكتەرگە سۇيەنسەك، قازىرگى كۇنى قازاقستاندا 7 مىڭعا جۋىق بۇلان بار. سانى كەيىنگى جىلدارى ءۇش ەسەگە ءوسىپ، ارقا جەرىندەگى نۋ ورماندى، تاۋلى ايماقتاردا كوبەيە باستاعانى بايقالادى دەيدى تابيعات قورعاۋ ينسپەكتورلارى. حالىقارالىق قىزىل كىتاپقا ەنگەنىمەن، جەر بەتىندەگى ناقتى سانى بەلگىسىز.
- 1985-جىلدان بەرى باياناۋىل ۇلتتىق تابيعي پاركى اۋماعىندا ءجيى بايقالىپ وتىر. كەزىندە رەسەيدىڭ قالىڭ ورماندارىندا، التاي تاۋلارىندا بولعان ورتتەن اۋىپ، قازاقستاندى مەكەندەي باستاعان جانۋار كوبىنە باياناۋىل، قارقارالى تاۋلارىنان ءورىس تاپقان. بۇل جانۋاردىڭ ءبىر ەرەكشەلىگى، اعزاسىندا جىلقى سەكىلدى ءوت بولمايدى. اشىلاۋىت، قامىستى، قوعالى جەرلەرگە جايىلعاندى، تەرەكتىڭ قابىعىمەن، تاۋداعى ارشامەن قورەكتەنگەندى ۇناتادى. ءبىزدىڭ باياناۋىل اۋماعىندا توپىراعى سورتاڭ، اشى جەرلەر كوپ. سولاردى ءجيى جاعالايتىنى بايقالادى. ەرەكشەلىگى، ءۇيىردى اسا ۇناتپايدى، ەكەۋدەن، ۇشەۋ-تورتەۋدەن جۇرە بەرەدى. اتالىعىنىڭ اسپانعا قاراي تارامدالىپ تۇراتىن جۋان ءارى جالپاق ءمۇيىزى بار. سىرتتاي قاراعاندا جۋاس كورىنگەنىمەن، كۇزگى كۇيەككە تۇسەتىن مەزگىلدە ولارعا جاقىنداۋ قاۋىپتى. ونداي ۋاقىتتا ادامعا شابۋىلداعان وقيعالاردى ءجيى ەستيمىز. جانۋاردىڭ كۇشتىلىگى سونشا، قاسقىرعا الدىرمايدى. تايىنشاداي ارلاندى مۇيىزىمەن ءىلىپ، جارىپ كەتەدى. باياناۋىلدىڭ كۇركەلى، جاياۋ مۇسا، قاراجار اۋىلدارى ماڭىنداعى بيىك تاۋلاردا، ءجالاڭتوس اسۋى مەن مىرزاشوقىدا، قوڭىر اۋليە ۇڭگىرى ماڭىندا ءجيى ۇشىراسادى، - دەيدى باياناۋىل ۇلتتىق تابيعي پاركىنىڭ ينسپەكتورى، بەلگىلى ولكەتانۋشى التىنبەك قۇرمانوۆ.
پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ مالىمەتىنشە، قازىرگى كۇنى باياناۋىلمەن قوسا، بۇلاندار شارباقتى اۋدانىنداعى جالقاراعاي ورماندارىندا دا بار. بۇل اۋماقتا شامامەن 170 بۇلان سانالدى.
