باتىس ەۋروپا - باتىس قىتاي ءدالىزىنىڭ بويىندا لوگيستيكالىق كەشەن سالىنادى
استانا. KAZINFORM - ۇكىمەت وتىرىسىندا ساۋدا جانە ينتەگراتسيا ءمينيسترى ارمان شاققاليەۆ باتىس ەۋروپا - باتىس قىتاي ءدالىزىنىڭ بويىندا سالىناتىن ساۋدا- لوگيستيكالىق كەشەن قاشان ىسكە قوسىلاتىنىن ايتتى.
- يندۋستريالىق ساۋدا- لوگيستيكالىق كەشەننىڭ ورنالاسۋ ورنى رەتىندە قازاقستان جاعىنداعى «قاراسۋ» وتكىزۋ پۋنكتى مەن قىرعىزستان جاعىنداعى «اق- تىلەك» پۋنكتتەرىنىڭ ماڭايى تاڭدالدى. بۇل قىرعىزستانمەن ەڭ قارقىندى ترانزيتتىك پۋنكتتەردىڭ ءبىرى. كەشەن «الماتى - بىشكەك» باعىتىنىڭ بويىندا ورنالاسادى، بۇل حالىقارالىق «باتىس ەۋروپا - باتىس قىتاي» اۆتوجولى ءدالىزىنىڭ ءبىر بولىگى. يندۋستريالىق ساۋدا- لوگيستيكالىق كەشەن قىزمەتتەردى ساقتاۋ، تاۋارلاردى الدىن الا ساتۋ ءۇشىن دايىنداۋ، كونسوليداتسيالاۋ جانە كوتەرمە پارتيالار بويىنشا قايتا ءبولۋ قىزمەتتەرىن ۇسىنادى، - دەدى مينيستر.
ايتۋىنشا، قازىر اتالمىش كەشەن ارقىلى جۇمىس ىستەيتىن رەزيدەنتتەر ىرىكتەلىپ جاتىر.
- ول پۋلعا اۋىل شارۋاشىلىعى، تاماق ونەركاسىبى، كوتەرمە جانە بولشەك ساۋدا سالاسىنداعى كومپانيالار كىرەدى. كەشەن اۋماعىندا جەڭىلدەتىلگەن شەكارالىق جۇيە مەن اۆتوكولىك قۇرالدارى مەن جۇكتەردى تىركەۋ جۇيەسى جۇمىس ىستەيتىن بولادى، ال تاۋارلار جاڭا كوپىر ارقىلى تاسىمالدانادى، بۇل قولدانىستاعى وتكىزۋ پۋنكتتەرىندەگى جۇكتەمەنى ايتارلىقتاي جەڭىلدەتۋگە مۇمكىندىك بەرەدى. جامبىل وبلىسى اكىمدىگى مەن كولىك مينيسترلىگى 2025 -جىلى كوپىر سالۋ بويىنشا ءتيىستى شارالار قابىلداۋى قاجەت. كەشەندى 2026 -جىلعا دەيىن ىسكە قوسۋ جوسپارلانۋدا، - دەدى ارمان شاققاليەۆ.
