باتىس قازاقستاندا سۋعا كەتكەن اۋىلدان تۇرعىندار تىكۇشاقپەن ەۆاكۋاتسيالانىپ جاتىر
ورال. KAZINFORM - باتىس قازاقستان وبلىسى قاراتوبە اۋدانى قورجىن اۋىلىنىڭ تۇرعىندارى تىكۇشاقپەن ەۆاكۋاتسيالانىپ جاتىر.
ب ق و ت ج دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، ادامداردى كوشىرۋگە ق ر قورعانىس مينيسترلىگىنىڭ م ي-8 ەكى تىكۇشاعى تارتىلدى. وسى ۋاقىتقا دەيىن اۋدان ورتالىعى قاراتوبە اۋىلىنا 92 ادام ەۆاكۋاتسيالاندى. جۇمىستار جالعاسۋدا. ب ق و اكىمىنىڭ ورىنباسارى باقىتجان نارىمبەتوۆتىڭ بريفينگىدە ءمالىم ەتكەنىندەي، وبلىس بويىنشا بارلىعى 663 ادام ەۆاكۋاتسيالىق قوسىنعا ورنالاستىرىلدى. سىرىم جانە قاراتوبە اۋداندارىندا جاعداي كۇردەلى كۇيىندە قالىپ وتىر.
«وڭىردە 321 مىڭنان استام تەكشە مەتر ەرىگەن قار سۋى سورىلىپ، 17 مىڭنان استام قاپتار توسەلدى. قازىرگى ۋاقىتتا 944 ادام 290 تەحنيكا، 141 موتوپومپامەن سۋ تاسقىنىنا قارسى جۇمىستاردى جۇرگىزۋدە. قوسىمشا ماڭعىستاۋ جانە الماتى وبلىستارىنان كۇش-قۇرالدار كومەككە تارتىلدى. ورال قالاسى، سونداي- اق قاراتوبە، تەرەكتى اۋداندارىندا جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى. وسىنداي شەشىم سىرىم اۋدانىندا دا دايىندالىپ جاتىر»، - دەدى باقىتجان حابەر ۇلى.
ەسكە سالا كەتەيىك، بۇدان بۇرىن باتىس قازاقستان وبلىسىندا 430 دان استام ۇيگە سۋ كىرگەنىن جازعان بولاتىنبىز.
سونداي-اق باتىس قازاقستان وبلىسىندا 18 جولدى تاسقىن سۋ شايىپ كەتتى.
