باتىس قازاقستاندا گۋمانيتارلىق كومەك قالاي ۇلەستىرىلىپ جاتىر
ورال. KAZINFORM - باتىس قازاقستان وبلىسىندا گۋمانيتارلىق كومەك قالاي ۇيىمداستىرىلىپ جاتىر؟ سۋ تاسقىنىنان زارداپ شەككەن تۇرعىندارعا قالاي جەتكىزىلۋدە؟ مىنە، وسى جونىندە باتىس قازاقستان وبلىسى گۋمانيتارلىق كومەكتى قابىلداۋ شتابىنىڭ باسشىسى اسلان تاپيشەۆ Kazinform تىلشىسىنە بايانداپ بەردى.
ونىڭ ايتۋىنشا، شتاب 5 ساۋىردە اشىلعاننان بەرى ءوز قىزمەتىن بارىنشا اتقارۋدا.
مۇنداعى باستى ماقسات - كەلگەن گۋمانيتارلىق كومەكتى سۇرىپتاپ، دايىنداپ، ورتاق بازاعا ەنگىزىپ، قالالىق جانە اۋداندىق شتابتارعا جەتكىزۋ.
«ەۆاكۋاتسيالىق پۋنكتتەردە جاتقان تۇرعىندارعا ۇكىمەت تاراپىنان دا، ۆولونتەرلار مەن كاسىپكەرلەر تاراپىنان دا قاجەتتى كومەك كورسەتىلىپ جاتىر. قالا بويىنشا 2500 دەن استام ەرىكتى بوگەتتەردى تۇرعىزۋعا اتسالىستى. ال 1 مىڭنان استام ەرىكتى گۋمانيتارلىق كومەكتى سۇرىپتاپ، دايىنداۋمەن اينالىسىپ جاتىر»، - دەيدى ا. تاپيشەۆ.
شتاب باسشىسىنىڭ مالىمدەۋىنشە، 5-ساۋىردەن بەرى وبلىسقا 1218,16 توننادان استام گۋمانيتارلىق كومەك جەتكىزىلسە، سونىڭ 500 تونناسى - ازىق-تۇلىك، 244,2 تونناسى - تۇرمىستىق-گيگيەنالىق زاتتار، 25 تونناسى - اۋىز سۋ، 298 تونناسى - قۇرىلىس ماتەريالدارى. سونداي-اق توسەك جابدىقتارى، شارۋاشىلىق قۇرالدارى - قايىقتار، گيدروكوستيۋمدەر بار.
«وبلىستىق كوميسسيانىڭ شەشىمىنە سايكەس ورال قالاسى، بايتەرەك، ءبورلى، تەرەكتى، قاراتوبە، اقجايىق اۋداندارىنا گۋمانيتارلىق كومەك ۇلەستىرىلىپ بەرىلۋدە. وبلىستىق شتاب ارقىلى جالپى 580 توننا گۋمانيتارلىق كومەك تاراتىلدى. «AMANAT» پارتياسى ب ق و فيليالى عيماراتىندا ورنالاسقان شتاب ارقىلى ورال قالاسىنىڭ قيىن جاعدايعا تاپ بولعان 2613 وتباسىنا ازىق-تۇلىك سەبەتتەرى جەتكىزىلدى»، - دەيدى ا. تاپيشەۆ.
باتىس قازاقستانعا رەسپۋبليكا وڭىرلەرى مەن قالالارىنان عانا ەمەس، وزگە ەلدەردەن قولۇشىن سوزىپ جاتقاندار بار. تەك سوڭعى كۇندەردى ايتقاننىڭ وزىندە، مىسالى، 22-ساۋىردە داعىستان رەسپۋبليكاسىنان 11 توننا كومەك كەلدى. مۇنىڭ نەگىزگى بولىگى - تاماق ونىمدەرى، شارۋاشىلىق زاتتارى جانە قۇرال-سايماندار. سول كۇنى شىمكەنت قالاسىنان سونداي جۇك تيەلگەن 60 توننا كومەك جەتكىزىلدى. بۇعان 23-ساۋىردە الماتى قالاسىنىڭ مەشىت جاماعاتى جىبەرگەن 20 توننا كومەكتى قوسۋعا بولادى. ال 24-ساۋىردە تاجىكستان رەسپۋبليكاسىنان 7 ۆاگونمەن 355 توننا گۋمانيتارلىق كومەك ورالعا جەتتى. مۇنىڭ 180 تونناسى - سەمەنت، 118 تونناسى - شيفەر، 32 تونناسى - كيىم-كەشەك، ىدىس-اياق، رەزەڭكە ەتىكتەر، 25 تونناسى - اۋىز سۋ.
باتىس قازاقستانعا العاشقىلاردىڭ قاتارىندا قىرعىز رەسپۋبليكاسى توتەنشە جاعدايلار مينيسترلىگىنىڭ 4 جۇك كولىگىمەن 80 توننا گۋمانيتارلىق كومەكتىڭ جەتكىزىلگەنىن اتاپ ءوتۋ كەرەك.
«ءبىز وسىنداي قىسىلتاياڭ ساتتە كومەك قولىن سوزعان جانداردىڭ بارىنە شىن جۇرەكتەن ريزاشىلىعىمىزدى بىلدىرەمىز»، - دەدى ا. تاپيشەۆ.
ەسكە سالا كەتەيىك، بۇدان بۇرىن ورال قالاسىندا 10 ەۆاكۋاتسيالىق پۋنكتتە 2400 دەن استام ادام ورنالاسقانىن جازعان بولاتىنبىز.
ب ق و-دا جايىق وزەنىندەگى سۋ دەڭگەيى تايپاقتان باسقا گيدروبەكەتتە تومەندەدى.
اۆتور
عايساعالي سەيتاق
