باتىس قازاقستاندا جەزبۇعا كولىندە بالىق قىرىلدى
ورال. KAZINFORM - تەرەكتى اۋدانى شاعاتاي اۋىلدىق وكرۋگى قىزىلجار ەلدى مەكەنى ماڭىندا جەزبۇعا كولىندە بالىقتىڭ قىرىلعانى جونىندە الەۋمەتتىك جەلىدە بەينەجازبا تارادى.
اۋىل تۇرعىندارىنىڭ سوزىنە قاراعاندا، جەزبۇعا كولىنىڭ جاعاسىندا بالىق قىرىلىپ قالعان. وسى كولدەن اۋىل ادامدارى بالىق اۋلايدى، سۋعا ءتۇسىپ، مال سۋارادى. سوندىقتان ونىڭ قاۋىپسىز بولعانى كەرەك.
شاعاتاي اۋىلدىق وكرۋگىنىڭ اكىمى رۇستەم مۇتييەۆتىڭ ايتۋىنشا، جەزبۇعا كولىنە 1994 -جىلدان بەرى سۋ كەلمەپ ەدى. بيىل سۋ مول كەلىپ، جاقسى بولىپ قالدى.
«بۇعان دەيىن ءبىزدىڭ اۋىل ماڭىندا كىشى بوبروۆىي كولىندە دە وسىنداي جاعداي بولىپ، شاباقتار ءولدى. ەندى جەزبۇعا كولىندە شاباقتار قىرىلعانىن تۇرعىندار حاباردار ەتتى. نەگىزىنەن موڭكە شاباقتارى، شورتاننىڭ شوراعايلارى ولگەن. مۇنىڭ سەبەبى، سۋدىڭ استىندا بالدىر كوپ، سودان تۇنشىعىپ قالعان سەكىلدى. ۇلكەن بوبروۆىي كولىندە دە بالىق ولگەن دەپ ەستىدىم. قازىرگى كەزدە ماسەلەنىڭ ءمان- جايى انىقتالىپ جاتىر»، - دەدى ر. مۇتيەۆ.
ب ق و سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستايەۆ سۋدىڭ قۇرامىن تەكسەرۋگە مامانداردىڭ جىبەرىلەتىنىن جەتكىزدى.
ب ق و ورمان شارۋاشىلىعى جانە جانۋارلار دۇنيەسىن قورعاۋ جونىندەگى اۋماقتىق ينسپەكتسياسىنىڭ باسشىسى نۇرلان راحىمجانوۆتىڭ ءمالىم ەتكەنىندەي، اقجايىق ورمان جانە جانۋارلار دۇنيەسىن قورعاۋ مەكەمەسىنىڭ قىزمەتكەرلەرى ولگەن بالىقتاردى جيناپ العان.
«بالىق ينسپەكتسياسىنىڭ يحتيولوگتارى پاتولوگيالىق ماتەريالدى الىپ، زەرتتەيدى. سودان كەيىن بالىقتىڭ نەدەن ولگەنى انىقتالادى»، - دەدى ن. راحىمجانوۆ.
