باتىس قازاقستاندا جايىق سۋى ەڭ جوعارى دەڭگەيگە كوتەرىلدى

ورال. KAZINFORM - باتىس قازاقستان وبلىسىندا جايىق وزەنىندەگى سۋ دەڭگەيى اقجايىق اۋدانى تايپاق اۋىلى تۇسىندا 899 سانتيمەترگە (قاۋىپتى شەگى - 850 س م) جەتتى.

«قازگيدرومەت» ر م ك بقو فيليالىنىڭ 5-مامىر كۇنگى ساعات 08.00 دەگى مالىمەتى بويىنشا تايپاق گيدروبەكەتىندە ءبىر تاۋلىكتە سۋ دەڭگەيى 42 سانتيمەترگە كوتەرىلدى.

بيىلعى 22-ساۋىردە جايىقتىڭ دەڭگەيى ورال قالاسى تۇسىندا 865 سانتيمەترگە جەتكەن ەدى. تايپاقتا ودان 34 سانتيمەترگە اسىپ كەتىپ وتىر.

ەسەسىنە جايىق وزەنى بويىنداعى باسقا گيدروبەكەتتەردە سۋ دەڭگەيى تۇسۋدە. اتاپ ايتقاندا، بايتەرەك اۋدانى يانۆارتسيەۆ اۋىلىندا ءبىر تاۋلىكتە 8 (800 س م، قاۋىپتى شەگى - 1250 س م)، ورال قالاسىندا 7 (792 س م، 850 س م)، كوشىمدە 5 (813 س م) سانتيمەترگە تومەندەدى. سونداي- اق كوشىم كانالىندا بىردەن 22 سانتيمەترگە ءتۇستى.

ەسكە سالا كەتەيىك، بۇدان بۇرىن باتىس قازاقستان وبلىسىندا جاڭادان سۋ قويمالارى قاشان سالىناتىنىن جازعان بولاتىنبىز.