باتىس قازاقستاندا شىعىنعا ۇشىراعان 1200 گە جۋىق مال باسى ءۇشىن وتەماقى تولىقتاي تولەندى
ورال. KAZINFORM - باتىس قازاقستان وبلىسىندا سۋ تاسقىنىنا بايلانىستى توتەنشە جاعداي سالدارىنان ولگەن مال باسىنىڭ سانىن انىقتاۋ جانە وتەۋ جۇمىستارى اياقتالۋعا جاقىن.
ب ق و اكىمىنىڭ ورىنباسارى قاليار ايتمۇحامبەتوۆتىڭ Kazinform تىلشىسىنە ءمالىم ەتكەنىندەي، اۋدانداردا قۇرىلعان ارنايى كوميسسيالار سۋ تاسقىنى سالدارىنان 162 ءوتىنىش بويىنشا 2457 مالدىڭ شىعىنعا ۇشىراعانىن راستادى.
سونىڭ ىشىندە 368 ءى - ءىرى قارا، 92-جىلقى، 1743 ءى - ۇساق مال، 116 سى - شوشقا، 138 ءى - ءۇي قۇستارى.
قاليار شاديار ۇلىنىڭ سوزىنە قاراعاندا، ۆەتەرينارلىق قىزمەت جەرگىلىكتى اكىمدىكتەرمەن بىرلەسىپ، ولگەن جانۋارلاردىڭ ولەكسەلەرىن جويۋ جۇمىستارىن تولىقتاي جۇرگىزدى. جانۋارلاردىڭ ولەكسەلەرىن جويۋ جۇمىستارى ورتەۋ ارقىلى ارنايى قازىلعان شۇڭقىرلارعا كومىلىپ، كادەگە جاراتۋ اكتىسى تولتىرىلدى.
وبلىس اكىمى ورىنباسارىنىڭ ايتۋىنشا، ەسەپتەۋ جۇمىستارى قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆتىڭ ءتوراعالىق ەتۋىمەن وتكەن سۋ تاسقىنىنا قارسى ءىس-شارالاردى ۇيلەستىرۋ جانە 2024 -جىلعى سۋ تاسقىنى كەزەڭىنىڭ سالدارىن جويۋ جونىندەگى رەسپۋبليكالىق شتاب وتىرىسى بەكىتكەن سۋ تاسقىنىنان شىعىن (ءولىم) بولعان اۋىل شارۋاشىلىعى جانۋارلارىنىڭ قۇنىن وتەۋ جونىندەگى الگوريتمىنە سايكەس اتقارىلدى.
شىعىن كولەمى ۇلتتىق ستاتيستيكا بيۋروسى جاريالايتىن اۋىل شارۋاشىلىعى جانۋارلارىنىڭ تۇرلەرى مەن جىنىستىق- جاس توپتارى بولىنىسىندە ولاردىڭ نارىقتىق قۇنى تۋرالى دەرەكتەر نەگىزىندە ايقىندالدى.
«ايقىندالعان شىعىندار نەگىزىندە وبلىس بيۋدجەتىنىڭ توتەنشە جاعدايلار رەزەرۆىنەن سۋ تاسقىنىنان ولگەن اۋىل شارۋاشىلىعى جانۋارلار قۇنىن وتەۋ ءۇشىن 187,5 ميلليون تەڭگە ءبولىندى. اتالعان قاراجاتقا اۋىل شارۋاشىلىعى جانۋارلارىن بىردەيلەندىرۋ جۇيەسىندە تىركەلگەن 1177 مال باسى ءۇشىن وتەماقى تولىقتاي تولەندى. اۋىل شارۋاشىلىعى جانۋارلارىنىڭ بىردەيلەندىرۋ جۇيەسىندە تىركەلمەگەن مال باستارىنا شىعىندى وتەۋ بيۋدجەتتىك ەمەس كوزدەردەن جۇرگىزىلۋدە. كۇنى بۇگىنگە دەيىن 178 باس مال، سونىڭ ىشىندە 27 باس ءىرى قارا، 139 باس قوي-ەشكى جانە 12 باس جىلقى تولدەرى وتەلدى. وسى اپتانىڭ سوڭىنا دەيىن مال شىعىنىن وتەۋ جۇمىستارىن تولىق اياقتاۋدى جوسپارلاپ وتىرمىز»، - دەدى ق. ايتمۇحامبەتوۆ.
ەسكە سالا كەتەيىك، بۇدان بۇرىن ورال قالاسىندا 350 دەن استام ساياجاي ءۇيى تۇرۋعا جارامسىز ەكەندىگىن جازعان بولاتىنبىز.
