باتىل شەشىم قابىلداڭىزدار: بەكتەنوۆ مينيسترلىكتىڭ كەمشىلىگىن اتادى
استانا. KAZINFORM - دەنساۋلىق ساقتاۋ مينيسترلىگى جۇمىس ءتاسىلىن وزگەرتىپ، وتاندىق وندىرۋشىلەرمەن جانە شەتەلدىك ينۆەستورلارمەن ءوزارا بايلانىستاردى جانداندىرۋى كەرەك. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ءمالىم ەتتى.
«ەندىگى تاعى ءبىر ماڭىزدى مىندەت - وتاندىق فارماتسيەۆتيكا ونەركاسىبىن دامىتۋ. ءبىز جەرگىلىكتى ءدارى-دارمەك وندىرۋشىلەردى قولداپ، جاڭا وندىرىستەر اشۋ ءۇشىن قولايلى جاعداي جاساپ جاتىرمىز. ءوزىمىزدىڭ وتاندىق ءفارموندىرىسى دارىلىك زاتتاردىڭ يمپورتىن ازايتۋعا جانە نارىقتاعى باعاسىن تۇراقتاندىرۋعا مۇمكىندىك بەرىپ وتىر. سوندىقتان قازاقستاندىق زاۋىتتاردىڭ وندىرىستىك قۋاتىن ەسكەرە وتىرىپ، ولاردا ءونىم شىعارۋ كولەمىن ۇلعايتۋ كەرەك. بۇل سالاعا ءىرى حالىقارالىق فارماتسيەۆتيكالىق كومپانيالار مەن عىلىمي ۇيىمداردى دا تارتۋ قاجەت. وسى جەردە توقتالا كەتەتىن ماسەلە، ماعان وتاندىق جانە شەتەلدىك ينۆەستورلار سالالىق مينيسترلىكپەن ءوزارا بايلانىس جاساۋ قيىن ەكەنىن ايتادى. ولار بىزدەگى جاڭا جوبالاردى قولداۋ جانە قازاقستاندىق دارىلەردى جەتكىزۋ ءۇشىن ۇزاق مەرزىمدى شارت جاساۋ ماسەلەسىن كوتەرىپ وتىر»، - دەدى و. بەكتەنوۆ.
بۇل تۇرعىدا پرەمەر-مينيستر دەنساۋلىق ساقتاۋ مينيسترلىگى جۇمىس ءتاسىلىن وزگەرتىپ، وتاندىق وندىرۋشىلەرمەن جانە شەتەلدىك ينۆەستورلارمەن ءوزارا بايلانىستاردى جانداندىرۋى كەرەك ەكەنىن تاپسىردى.
«شەشىم قابىلداۋدا باتىلىراق بولىڭىزدار. جاڭا وندىرىستەردى اشۋعا جاعداي جاسالۋى ءتيىس. سونداي-اق، ءوزىمىزدىڭ زەرتتەۋلەرىمىزدى دامىتۋ قاجەت. ونىڭ ىشىندە جوعارى تەحنولوگيالىق وندىرىستەر مەن تەحنولوگيالاردى شەتەلدەن ترانسفەرتتەۋ ماسەلەسىنە دە ءتيىستى كوڭىل بولگەن ءجون. بۇل جۇمىسقا عىلىم جانە جوعارى ءبىلىم مينيسترلىگى اتسالىسۋى ءتيىس»، - دەدى ۇكىمەت باسشىسى.
بۇعان دەيىن حابارلانعانداي، ولجاس بەكتەنوۆ 2025 -جىلعا ارنالعان ءدارى-دارمەكتى جەتكىزۋ راسىمدەرىن جىل سوڭىنا دەيىن اياقتاۋدى تاپسىردى.
اۆتور
رۋسلان عابباسوۆ
