باتۋ حان تۋرالى تاريحي رومان جازىلىپ جاتىر

استانا. KAZINFORM - التىن وردانىڭ نەگىزىن قالاعان تۇلعالاردىڭ ءبىرى، شىڭعىس حاننىڭ داڭقتى نەمەرەسى باتۋ حان تۋرالى تاريحي رومان جازىلىپ جاتىر. بۇل تۋرالى استانادا وقىرماندارمەن كەزدەسكەن جازۋشى، «جوشى حان» تاريحي رومانىنىڭ اۆتورى ۇلاربەك دالەي ۇلى ايتىپ بەردى.

اۆتور «جوشى حان» رومانىن جازۋعا دايىندىق بارىسىندا ءتورت جىلعا سوزىلعان زەرتتەۋ ەڭبەكتەرىنىڭ نەگىزىندە شىڭعىس زامانى جايلى تەرەڭ جانە تىڭ دەرەكتەردىڭ ىزىنە تۇسكەن.

- وسى كىتاپتان كەيىن، اراعا ازداپ ءۇزىلىس تاستاپ، جينالعان تاريحي دەرەكتەر نەگىزىندە «جوشى حان» تاريحي-دەرەكتى رومانىنىڭ جالعاسى ىسپەتتى «باتۋ حان» رومانىن جازۋعا وتىرعان ەدىم. بۇيىرسا، الداعى قاراشا ايىندا وقىرمانعا جول تارتادى دەگەن ءۇمىت پەن جوسپار بار. «فوليانت» باسپاسىمەن كەلىسىمشارتقا وتىرىپ، رەداكسيالىق جۇمىستارى باستالىپ تا كەتتى. بۇل رومان دا اۋەلگى باعىتىم بويىنشا تاريحي-دەرەكتى دۇنيە. ودان سونشاما ءبىر كوركەمدىك پەن قيال ىزدەپ اۋرە بولۋدىڭ كەرەگى شامالى دەر ەدىم. وقىرمانداردىڭ تالابىن ەسكەرە وتىرىپ، كوپ سوزگە بوي الدىرماي، مۇمكىندىگىنشە سىعىمداپ جازۋعا تىرىستىم. ناقتى تاريحي قۇجاتتار مەن دەرەكتەرگە، انىق تاڭباعا تۇسكەن جازبالارعا نەگىزدەلگەن سوڭ، «رومان جازعاننىڭ ءجونى وسى» دەپ ارتىق قيالعا بوي ۇرىپ، شىن تاريحتان الشاقتاپ كەتۋدى ءجون كورمەدىم. باعاسىن پاتشا كوڭىل وقىرمانىم ءوزى بەرەر، - دەيدى جازۋشى.

ول، سونىمەن بىرگە، الداعى ۋاقىتتا وسى جەلىمەن تاريحي روماندار سەرياسىن جازۋدى جالعاستىراتىنىن ايتتى.

- جوشى حان نەگىزىن قالاعان، باتۋ حان ىرگەسىن كەڭەيتكەن التىن وردا داۋىرىندەگى داڭقتى حاندار تۋرالى تاريحي روماندار سەرياسىن جازۋدى جوسپارلاعانمىن. قازىر سول ويعا العان ارمانىمدى جۇزەگە اسىرۋ جولىندا العا جىلجىپ كەلەمىن، - دەيدى ۇلاربەك دالەي ۇلى.

اۆتور

ريزابەك نۇسىپبەك ۇلى