باسپانا ساتىپ الۋ- ساتۋدا وزگەرىس بولۋى مۇمكىن
استانا. قازاقپارات - قازاقستاندا ءۇي ساتىپ الۋ كەزىندە قولما-قول اقشاسىز ەسەپ ايىرىسۋ ۇسىنىلىپ وتىر. وتباسى بانك ءتوراعاسى ءلاززات يبراگيموۆانىڭ ايتۋىنشا، بۇل نارىقتا ادىلدىك ورناتۋعا جانە الدانعان ۇلەسكەرلەر سانىن ازايتۋعا كومەكتەسەدى.
سەنات دالىزىندە وتباسى بانك باسشىسىنان ق ق س (قوسىلعان قۇن سالىعى - ەسك. ) ءوسىمى قازاقستانداعى تۇرعىن ءۇي نارىعى مەن باعاسىنا قالاي اسەر ەتۋى مۇمكىن ەكەنى سۇرالعان.
ءلاززات يبراگيموۆانىڭ سوزىنشە، بۋحگالتەرلىك ەسەپپەن، ق ق س-پەن جۇمىس ىستەيتىن ءىرى كومپانيالار باعا وسكەنىن سەزبەيدى. الايدا ءبىر-ەكى ءۇي سالاتىن شاعىن قۇرىلىس كومپانيالارى ەسەپ جۇيەسىن قايتا قۇرۋى قاجەت بولادى.
«ق ق س ءوسىمى بۋحالتەرلىك ەسەپتەرى دۇرىس، ق ق س-پەن جۇمىس ىستەيتىن ءىرى كومپانيالارعا اسەر ەتپەيدى. ويتكەنى ساتىپ الىناتىن ماتەريالدار مەن شيكىزاتتى دۇرىس ەسەپكە السا، ق ق س سالىنىپ قويادى جانە ونى شەگەرۋگە بولادى»، - دەدى يبراگيموۆا.
الايدا كىشىگىرىم كومپانيالار ءۇشىن بۇل جاڭالىق قيىنعا سوعۋى مۇمكىن، ويتكەنى ولار اشىق ەسەپكە كوشۋگە ءماجبۇر بولادى.
«قازىر كوپتەگەن قۇرىلىس كومپانياسى سالىقتان جالتارۋ ءۇشىن بىرنەشە شاعىن فيرما قۇرىپ الادى. وسىلايشا ۇلەسكەرلەر دالادا قالىپ جاتادى، ويتكەنى شاعىن قۇرىلىس كومپانياسىنا اقشا سالادى دا، كەيىن قۇرىلىس كومپانياسىن تابا الماي قالادى»، - دەدى بانك باسشىسى.
ءلاززات يبراگيموۆانىڭ ايتۋىنشا، تاعى ءبىر ماڭىزدى باستاما - جىلجىمايتىن مۇلىك ساتىپ الۋ كەزىندە قولما-قول اقشاسىز ەسەپ ايىرىسۋعا كوشۋ.
«قازىر ەكى باستاما ماڭىزدى: ءبىرى - قولما-قول اقشاسىز ءۇي ساتىپ الۋ. بۇل نارىقتى كولەڭكەدەن شىعارۋعا كومەكتەسەدى. وعان قوسا تۇرعىن ءۇي ساتىپ الۋ كەزىندە ققس ەنگىزۋ بار»، - دەيدى ول.
