باسپالداقپەن جىلدام كوتەرىلۋ ەنەرگيا مەن اقىل-وي قابىلەتىن ارتتىرادى

استانا. قازاقپارات - جاڭا زەرتتەۋ ناتيجەلەرى باسپالداقپەن جىلدام كوتەرىلۋ كوگنيتيۆتىك قابىلەتتەردى جاقسارتاتىنىن جانە كوڭىل كۇيدى كوتەرەتىنىن كورسەتتى. بۇل فيزيكالىق بەلسەندىلىككە قاتىسقان ادامدار تاپسىرمالاردى تەزىرەك ورىنداي وتىرىپ، وزدەرىن باقىتتى ءارى ەنەرگياعا تولى سەزىنگەن. زەرتتەۋ ناتيجەلەرى Journal of Cognitive Enhancement جۋرنالىندا جاريالاندى.

قىسقا فيزيكالىق بەلسەندىلىك، مىسالى، بىرنەشە مينۋت سەرۋەندەۋ، باسپالداقپەن كوتەرىلۋ نەمەسە دەنە جاتتىعۋلارىن جاساۋ جۇرەك- قان تامىرلارى دەنساۋلىعىن جاقسارتادى، سترەسستى ازايتادى جانە قانداعى قانت دەڭگەيىن رەتتەيدى. مۇنداي بەلسەندىلىك كۇندەلىكتى ءومىر سالتىنا جىلدام ەنىپ، جىلداپ ادەتكە اينالادى جانە دەنساۋلىققا زور پايدا اكەلەدى.

باسپالداقپەن كوتەرىلۋ - ۋاقىتتى ۇنەمدەيتىن، ءارى پايدالى ارەكەت. بۇل جاتتىعۋ دەنەنىڭ اۋىرلىق كۇشىنە قارسى قوزعالۋىن تالاپ ەتىپ، فيزيكالىق جانە پسيحولوگيالىق جاعدايدى جاقسارتۋعا كومەكتەسەدى.

زەرتتەۋدى اندرەاس ستەنلينگ جانە ونىڭ ارىپتەستەرى جۇرگىزدى. ولار باسپالداقپەن 1 مينۋتتىق 6 رەت كوتەرىلۋ كوگنيتيۆتىك قابىلەت پەن كوڭىل كۇيگە قالاي اسەر ەتەتىنىن زەرتتەدى. زەرتتەۋگە 20 جاستاعى 52 ستۋدەنت قاتىستى، ولاردىڭ 26-سى ايەلدەر.

قاتىسۋشىلار ەكى توپقا ءبولىندى:

ءبىرىنشى توپ باسپالداقپەن 1 مينۋتتان 6 رەت كوتەرىلدى. ءار كوتەرىلۋ اراسىندا 1 مينۋتتىق ءۇزىلىس جاسالدى.
ەكىنشى توپ تەستىلەۋ بولمەسىندە وتىرىپ، باقىلاۋ تاپسىرمالارىن ورىندادى.
ءار توپ ءوز تاپسىرماسىن ورىنداعاننان كەيىن كوگنيتيۆتىك تەستتەردەن ءوتىپ، كوڭىل كۇيلەرىن باعالادى. كەيىن توپتار ورىن الماستى.

باسپالداقپەن كوتەرىلگەن قاتىسۋشىلار كوگنيتيۆتىك تاپسىرمالاردى جىلدام ورىنداپ، كوڭىل كۇيى جاقسارعانىن ايتتى. ولار كوگنيتيۆتىك يكەمدىلىك پەن اتقارۋشى فۋنكتسيالاردى باعالايتىن تاپسىرمالاردا جاقسى ناتيجە كوراق، فيزيكالىق بەلسەندىلىك كەزىندە جۇرەك سوعۋ جيىلىگى جوعارىلاعان قاتىسۋشىلار كوگنيتيۆتىك تەستتەردى تەزىرەك ورىندادى. بۇل اسەرلەر ەرلەر مەن ايەلدەردە بىردەي بايقالدى.

عالىمدار باسپالداقپەن قىسقا ۋاقىت كوتەرىلۋ فيزيكالىق ەنجارلىق ماسەلەسىن شەشۋدىڭ ءتيىمدى ءادىسى بولۋى مۇمكىن ەكەنىن ايتادى. بۇل ءتاسىل كوڭىل كۇيدى كوتەرىپ، كوگنيتيۆتىك قابىلەتتەردى جاقسارتۋعا ىقپال ەتەدى.

دەگەنمەن، بۇل ناتيجەلەر بەلسەندىلىكتەن كەيىن بىردەن انىقتالعان جانە ۇزاق مەرزىمدى اسەرلەرى زەرتتەلمەگەن. سونىمەن قاتار، قاتىسۋشىلاردىڭ بارلىعى جاس ءارى دەنى ساۋ ستۋدەنتتەر بولعاندىقتان، مۇنداي ناتيجەلەردى ۇلكەن جاستاعى نەمەسە فيزيكالىق جاعدايى ناشار ادامداردا كورۋگە بولاتىنى ازىرگە بەلگىسىز.