باس پروكۋراتۋرا الماسبەك سادىربايعا قانداي ايىپ تاعىپ وتىرعاندارىن ايتتى
استانا. KAZINFORM - باس پروكۋراتۋرا Kazinform ساۋالىنا جولداعان جاۋاپتا سۋبسيديا سحەماسىمەن 1,2 ميلليارد تەڭگە جىمقىردى دەگەن كۇدىككە ىلىنگەن «شاڭىراق» قوعامدىق بىرلەستىگىنىڭ باسشىسى الماسبەك سادىربايدىڭ ءىسى نەگە قارجىلىق مونيتورينگ اگەنتتىگىنەن ارنايى پروكۋرورلارعا وتكەنىن ءتۇسىندىردى.
- قازىرگى تاڭدا ا. سادىرباي ق ك-نىڭ 190-بابىنىڭ 4-بولىگىنىڭ 2-تارماعىمەن كوزدەلگەن قىلمىستىق قۇقىق بۇزۋشىلىق جاسادى دەگەن كۇدىكپەن الماتى جانە جەتىسۋ وبلىستارى بويىنشا قىلمىستىق- اتقارۋ جۇيەسى دەپارتامەنتىنە قاراستى تەرگەۋ يزولياتورىندا كۇزەتپەن ۇستاۋ تۇرىندەگى بۇلتارتپاۋ شاراسىمەن قاماۋعا الىنعان، - دەپ جازىلعان جاۋاپتا.
ايتا كەتۋ كەرەك، بۇل تارماق وسى باپتىڭ العاشقى 3-بولىگىندە كورسەتىلگەن قىلمىستاردى اسا ءىرى مولشەردە جاساعان جاعدايدا قولدانىلادى. ونىڭ ىشىندە مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامعا تەڭەستىرىلگەن تۇلعا رەتىندە ادامدار توبىمەن ءسوز بايلاسا وتىرىپ، ءوزىنىڭ قىزمەت بابىن پايدالانا وتىرىپ، اقپاراتتىق جۇيەنى پايدالانۋشىنى الداۋ نەمەسە سەنىمىن تەرىس پايدالانۋ ارقىلى مەملەكەتتىك ساتىپ الۋ سالاسىندا ەكى نەمەسە ودان دا كوپ ادامعا قاتىستى بىرنەشە رەت جاسالعان الاياقتىق جولمەن بوتەننىڭ مۇلكىن جىمقىرۋ نەمەسە بوتەن مۇلىككە قۇقىقتى يەمدەنۋ ارەكەتتەرى بار. كۇدىكتىنى سوت كىنالى دەپ تانىسا، مۇلكى تاركىلەنىپ، 10 جىلعا دەيىن باس بوستاندىعىنان، ءومىر بويىنا بەلگىلى ءبىر قىزمەتتەرمەن اينالىسۋ قۇقىعىنان ايىرىلۋى مۇمكىن.
ەسكە سالساق، اۋەلدە قارجىلىق مونيتورينگ اگەنتتىگى الماسبەك سادىربايدى قىلمىستىق كودەكستىڭ 189-بابى بويىنشا قاماۋعا العان بولاتىن.
باس پروكۋراتۋرا بۇل ءىس وزدەرىنىڭ قاراۋىنا نەگە الىنعانىن بىلايشا تۇسىندىرەدى:
- اتالعان قىلمىستىق ءىس قىلمىستىق-پروتسەسسۋالدىق كودەكستىڭ 194-بابىنىڭ نەگىزىندە الماتى وبلىسى بويىنشا ەكونوميكالىق تەرگەپ-تەكسەرۋ دەپارتامەنتىنەن تەرگەۋ رەتتىلىگىمەن الماتى وبلىسى پروكۋراتۋراسىنىڭ سوتقا دەيىنگى تەرگەپ-تەكسەرۋ باسقارماسىنىڭ وندىرىسىنە قابىلدانعان. بۇگىنگى كۇنى قىلمىستىق ءىس بويىنشا سوتقا دەيىنگى تەرگەپ-تەكسەرۋ جۇرگىزىلۋدە. ق پ ك-نىڭ 201-بابىنىڭ تالاپتارىنا سايكەس، تەرگەپ-تەكسەرۋدىڭ وزگە مالىمەتتەرى جاريا ەتۋگە جاتپايدى، - دەپ جازادى باس پروكۋراتۋراداعىلار.
اتالعان كودەكستىڭ 194-بابىنىڭ 3-تارماعىندا ءىس تىم كۇردەلى بولسا، ءارى ءادىل جۇرگىزىلىپ جاتقانىنا كۇمان تۋىنداسا، قىلمىستىق ءىستى پروكۋراتۋرا ءوزى قاراۋى مۇمكىن ەكەنىن ايتىلعان.
