باس كيىم سوزىلىپ كەتپەس ءۇشىن ونى قالاي دۇرىس جۋۋ كەرەك؟

باس كيىمدى سۋىقتان قورعانۋ ءۇشىن عانا ەمەس، سونداي-اق ستيلدى كورىنۋ ءۇشىن دە كيەدى. باس كيىم دە باسقا كيىمدەر سياقتى لاستانادى. الايدا باس كيىمدەگى لاستىق اسا كورىنە بەرمەيدى.

دەسە دە، وعان شاشىڭىزداعى تەرى مايلارى جانە قولىڭىزداعى لاستىق جينالاتىنىن ۇمىتپاۋ كەرەك. باس كيىم سوزىلىپ جانە تۇتىكتەنىپ كەتپەس ءۇشىن ونى قالاي دۇرىس جۋۋ كەرەك؟

باس كيىمدى ايىنا ءبىر رەت جۋىپ تۇرعان دۇرىس. ءبىراق كەي ماتەريالداردى كىر جۋعىش ماشيناعا سالۋعا كەلمەيدى. سوندىقتان باس كيىمدەردى قولمەن جۋعان ءجون.

باس كيىمدى قالاي ۇقىپتى جۋۋعا بولادى؟

لەگەنگە سۋىق سۋ قۇيىڭىز؛

وعان ءبىر شاي قاسىق كىر جۋعىش ۇنتاق سالىپ ارالاستىرىڭىز؛

باس كيىمدى وسى سۋعا سالىپ، 5-10 مينۋتقا قالدىرىڭىز؛

ەگەر باس كيىمدە داق بولسا، ونى قاتتى ىسقىلاماي، جايلاپ ۋقالاپ جۋىپ الىڭىز؛

سودان سوڭ سابىندى سۋدى اعىزىپ جىبەرىپ، تازا سۋىق سۋ قۇيىڭىز.

باس كيىمنىڭ سابىنى كەتكەنشە وسى پروتسەدۋرانى قايتالاڭىز؛

شايىپ بولعان سوڭ باس كيىمدى قۇرعاق تازا سۇلگىنىڭ ۇستىنە قويىپ، ارتىق ىلعالدى الۋ ءۇشىن جايلاپ قىسىپ الىڭىز. باس كيىمدى وراپ سىعۋعا بولمايدى. ايتپەسە، ونىڭ ماتەريالى سوزىلىپ كەتەدى جانە ول تۇتىكتەنەدى؛

باس كيىمدى باسقا قۇرعاق سۇلگىنىڭ ۇستىنە جايىپ قويىپ كەپتىرىڭىز.

massaget.kz