باس باپكەر قازاق ءتىلىن قۇرمەتتەمەگەنى ءۇشىن ايىپپۇل تولەيتىن بولدى
استانا. KAZINFORM - فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆ باسپا ءسوز ءماسليحاتى كەزىندەگى ارەكەتى ءۇشىن جازا ارقالادى.
ايتا كەتسەك، ەل قۇراماسىنىڭ ۇلتتار ليگاسى اياسىندا ءوز الاڭىمىزدا وتكەن سلوۆەنيامەن كەزدەسۋىنەن كەيىن وعان پ س ج جەيدەسىن كيگەن جۋرناليست قازاق تىلىندە ساۋال قويعان ەدى. باس باپكەر سۇراق قويعان جۋرناليستكە «فرانسۋز تىلىندە سۇراق قويىپ تۇرسىڭ با؟» دەپ ايتقان بولاتىن.
بۇل جاعداي الەۋمەتتىك جەلىدە كوپشىلىك اراسىندا تالقىلاندى. باس باپكەردىڭ بۇل ورەسكەل ارەكەتى ءۇشىن قازاقستان فۋتبول فەدەراتسياسى تاراپىنان ايىپپۇل سالىندى. ايىپپۇل كولەمى - 200-ايلىق ەسەپتىك كورسەتكىش (738400 تەڭگە).
ەسكە سالساق، اتالعان جاعدايعا بايلانىستى ق ر تۋريزم جانە سپورت مينيسترلىگى بۇل جاعدايعا بەيجاي قاراماي، قازاقستان فۋتبول فەدەراتسياسىنا رەسمي حات جولداپ، باس باپكەردىڭ ارەكەتىنە قاتىستى فۋتبول فەدەراتسياسىنان تۇسىنىكتەمە بەرۋدى تالاپ ەتكەن بولاتىن.
«الەۋمەتتىك جەلىلەردە جاريالانعان فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قازاق تىلىنە قۇرمەت كورسەتپەۋىنە قاتىستى ۆيدەوعا بايلانىستى قازاقستان فۋتبول فەدەراتسياسى جاعدايدى ءتۇسىندىرۋى قاجەت دەپ سانايدى. جازبادا ۆيدەونىڭ ءۇزىندىسى كورسەتىلگەن. نەگىزى بۇل سۇراقتى فرانسيانىڭ پ س ج كلۋبىنىڭ فورماسىن كيىپ جۇرگەن قازاقستاندىق جۋرناليست بەگاسىل سەيىتقانوۆ باسپا ءسوز ءماسليحاتىندا قويعاننان كەيىن باس باپكەر ازىلدەپ جاۋاپ قايتارعان بولاتىن. ستانيسلاۆ چەرچەسوۆ قازاق ءتىلى مەن ەلىمىزدىڭ مادەنيەتىنە ۇلكەن قۇرمەتپەن قارايدى، سونىمەن قاتار قازاق ءتىلىن بەلسەندى تۇردە وقىپ جاتقانىن مالىمدەيمىز»، - دەپ تۇسىنىكتەمە بەردى فۋتبول فەدەراتسياسىنىڭ باسپا ءسوز قىزمەتى.
اۆتور
ءادىلجان ۇمبەت
