«بارىس» بابىنا قاشان كەلەدى
استانا. KAZINFORM - ەلوردالىق «بارىس» جاڭا ماۋسىمدى وتە ءساتسىز باستادى. قۇرلىقتىق حوككەي ليگاسىنداعى ون ءبىر ويىننىڭ توعىزىندا جەڭىلىستىڭ اشى ءدامىن تاتتى.
ساتسىزدىك سەرياسىن توقتاتا الماي كەلە جاتقان ەلوردالىق كلۋب قازىردىڭ وزىندە كانادالىق مامان دەۆيد نەميروۆسكيدى قىزمەتىنەن الىپ، ورنىنا رەسەيلىك ۆياچەسلاۆ بۋتسايەۆتى الىپ كەلدى. كوماندا جاڭا باپكەرمەن العاشقى ويىندا جەڭىسكە جەتكەنىمەن ودان كەيىن قايتادان ەكى مارتە جەڭىلىپ قالدى. ازىرگە ەلوردالىق كلۋب تىعىرىقتان شىعا الار ەمەس. ساتسىزدىك وسىلايشا جالعاسا بەرسە، بيىل دا پلەي- وفف ساتىسىنا شىعۋى نەعايبىل. مۇنداي كەلەڭسىزدىك كەيىنگى ەكى جىلدا كورىنىس بەرىپ وتىر. جالپى، كوماندانىڭ مۇنداي سۇرەڭسىز ويىنىنا كىم كىنالى؟ Kazinform ءتىلشىسى اتالعان تاقىرىپتى وي ەلەگىنەن وتكىزىپ، ماسەلەنىڭ مانىسىنە ءۇڭىلىپ كوردى.
بارلىعى باپكەرگە دە بايلانىستى
1999 -جىلى تۇساۋىن كەسكەن كوماندا 2008 -جىلدان بەرى قۇرلىقتىق حوككەي ليگاسىندا ويىن كورسەتىپ كەلەدى. ون التى جىلدان استام ۋاقىتتان بەرى قازاقستاندىق جانكۇيەرلەردى تالاي مارتە جەڭىسىمەن جەلپىندىرگەنىن ءالى كۇنگە دەيىن ۇمىتا قويعان جوقپىز. سوندىقتان «بارىستىڭ» ءاربىر ساتسىزدىگى حوككەيدى قىزىعا تاماشالايتىن جەرگىلىكتى جۇرتشىلىققا اۋىر تيەدى.
راس، كوماندانىڭ قۇرىلۋداعى نەگىزگى ماقساتى - ساپالى شەتەلدىك ويىنشىلاردى تارتا وتىرىپ، قازاقستاندىق جاستاردى تاربيەلەپ شىعارۋ ەكەنى بەلگىلى. العاشقى جىلداردا برەندون بوچەنسكي، نايدجەل دوۋس، كيەۆين دەللمەن سەكىلدى شەتەلدىك حوككەيشىلەر «بارىستىڭ» جوعارى بيىكتەن كورىنۋىنە ۇلكەن قوستى.
ودان كەيىنگى جىلداردا داررەن ديتس، دجەسسي بلەكەر، فيليپپ ۆارونە، ليندەن ۆەي، كەرتيس ۆولك، ەنتوني كامارا، ياكوب ليليا سىندى تاجىريبەلى ويىنشىلار ەلوردالىق كلۋب ساپىندا ويىن كورسەتتى. ولاردىڭ ءاربىر ءىس- قيمىلى، مەرگەندىگى، شەبەرلىگى جانكۇيەرلەر كوز الدىندا ءالى كۇنگە دەيىن تۇر.
سول ءبىر جىلداردا «بارىستىڭ» باس باپكەرى قىزمەتىنە تاجىريبەلى ماماندار شاقىرىلدى. ولاردىڭ قاتارىندا شەتەلدىك جانە قازاقستاندىق ازاماتتار بار.
اتاپ ايتقاندا، بۇل تىزىمگە رەسەيلىك ۆلاديمير كريكۋنوۆ، فينليانديالىق اري-پەككا سەلين، بەلارۋستىك اندرەي سكابەلكا، قازاقستاندىق يۋريي ميحايليس سىندى باپكەرلەردى قوسۋعا بولادى.
ءوز تاريحىندا «بارىس» ءتورت مارتە قۇرلىقتىق حوككەي ليگاسىنىڭ پلەي-وفف ساتىسىنا شىعا العان جوق. وكىنىشىسى، ونىڭ ىشىندە كەيىنگى ەكى جىلدا وسىنداي ساتسىزدىك قايتالانىپ وتىر.
بۇل ورايدا ەڭ الدىمەن نەگىزگى ماسەلەنى كوماندا باسشىلىعىنان ىزدەۋگە بولادى. 2018 -جىلدان بەرى «بارىس» كومانداسى پرەزيدەنتى قىزمەتىن بوريس يۆانيشيەۆ اتقارىپ كەلەدى.
سونداي- اق باس مەنەدجەر مىندەتى ولەگ بولياكينگە جۇكتەلگەن. ەندىگى كەزەكتە وسى جىلدار ارالىعىندا كوماندانىڭ باس باپكەرى قىزمەتىن سەگىز مامان اتقارعانىن ايتا كەتەيىك. وعان قوسا حوككەيشىلەردىڭ دە جىلدا اۋىسىپ كەتىپ جاتقانىن ەستەن شىعارۋعا بولمايدى.
— كوماندا ساپىندا ق ح ل دەڭگەيىنە ساي ەمەس لەگيونەرلەر كوپ. ونى باس باپكەردىڭ ءوزى ايتىپ وتىر. جاقىندا عانا قۇرلىقتىڭ ار جاعىنان چەيس دەلەو دەگەن حوككەيشىنى اكەلدى. ەندى ماقتاۋىن كەلتىردى. ستاتيستيكالىق مالىمەتتەرىن جايىپ سالدى. ءۇش جىل ءبىر كوماندادا كاپيتان جانە ليدەر بولعانىن دا جازدى. ءبىراق، بۇل شابۋىلشى دا «بارىسقا» كومەكتەسە الماي ءجۇر. كەرەك دەسەڭىز، ول ءتىپتى ورتالىق شابۋىلشى ەمەس ەكەن. بۇل رەتتە كلۋبتىڭ قازىرگى باس باپكەرى ۆياچەسلاۆ بۋتسايەۆتىڭ ءوزى ايتتى. «بارىس» بەساسپاپ ورتالىق شابۋىلشىعا ءزارۋ. شايبا-تالاپايدا كومانداعا شايبانى الىپ بەرەر ورتالىق شابۋىلشى جوققا ءتان. وسى جاعىنان ىلعي ەسەسى كەتىپ جۇرەدى، - دەيدى حوككەي تاقىرىبىندا ءجيى جازىپ جۇرگەن سپورت ءجۋرناليسى نۇرعازى ساسايەۆ.
كاسىبي دەڭگەيى كۇمان كەلتىرەدى
ەندەشە، مۇنداي ساپاسىز لەگيونەردى الىپ كەلۋگە كىم مۇمكىندىك بەرىپ وتىر؟ ولاردىڭ الاتىن جالاقىسى دا قاراپايىم ادامدار ءۇشىن تاڭعالارلىق. بۇل جونىندە Sport Express باسىلىمىندا جاريالانعان دەرەكتەرگە كوز سالىپ كورەلىك.
بيىل كوماندا قۇرامىنا قوسىلعان كانادالىق مايكل ماكلاۋد تابىسىن جىلىنا 336,59 ميلليون تەڭگەگە جەتكىزەدى. ال رەسەيلىك دامير جافياروۆ، كانادالىق ناتان بولە، ۋەيد ەلليسون، ا ق ش- تان كەلگەن سي دجەي سميت، شۆەتسيالىق يۋحان ماتتسسون جىلىنا 61-280 ميلليون تەڭگە ارالىعىندا ەڭبەكاقى الادى.
— وسىنىڭ ءوزى قىرۋار اقشا ەمەس پە؟ قازىنا قازانىنان بولىنگەن قارجىنىڭ وتەۋى بار ما؟ ازىرگە ەشقانداي ناتيجە جوق. بار كىنانى قىزمەتىنەن كەتكەن باس باپكەر دەۆيد نەميروۆسكيگە ىسىرىپ قويامىز با؟ بالكىم، كەيىنگى ەكى جىلداعى ساتسىزدىك ءۇشىن كوماندا باسشىلىعىن دا اۋىستىرۋىمىز كەرەك شىعار، - دەيدى تاعى ءبىر سپورت جۋرناليسى تەلجان كۇدەروۆ.
بيىل كەلگەن حوككەيشىلەردىڭ شەبەرلىك دەڭگەيى تومەن ەكەنىن قازىرگى باس باپكەر ۆياچەسلاۆ بۋتسايەۆ تا جاسىرعان جوق. سوڭعى رەسەيدىڭ «تورپەدو» كومانداسىنان جەڭىلىستەن (1:10) كەيىن كەيبىر ويىنشىلاردىڭ كاسىبي دەڭگەيىنە سىن ايتتى.
— ايتا كەتسەك، «تورپەدومەن» كەزدەسۋدە كوپ ويىنشىلارعا كوڭىل تولعان جوق. ءبىرقاتار حوككەيشىلەر جانكۇيەر قولداۋىنا يە بولدى. سوندىقتان ولاردىڭ كوبىسىنە ايتىلاتىن سىن بار. قۇرلىقتىق حوككەي ليگاسى دەڭگەيىندە ويناي الاتىن كاسىبيلىگىن كورسەتە العان جوق. سول سەبەپتى ولارعا قاتىستى كوپ ساۋال قويىلادى، - دەدى ول.
باپكەردەن ارتىق ەشتەڭە ايتا الماسپىز. جالپى، بيىلعى سەلەكتسيا ماسەلەسىنىڭ سىن كوتەرمەي تۇرعانى ويلانتادى. بۇل كوماندا باسشىلىعى تاراپىنان جۇيەلى جۇمىس جۇرگىزىلمەگەنىن ايعاقتايدى.
شەتەلدىك حوككەيشىلەردىڭ دەڭگەيى قانداي؟
اشىعىن ايتساق، «بارىس» بيىل كوپتەگەن حوككەيشىلەرمەن كەلىسىمشارتتى ۇزارتقان جوق. كەيبىرى ءوز ەركىمەن باسقا كومانداعا اۋىسىپ كەتتى.
دەسە دە كوماندا قۇرامىنان ۇلتتىق قۇرامانىڭ نەگىزگى قاقپاشىسى اندرەي شۋتوۆ، كانادالىق قاقپاشى ەددي پاسكۋالە، چەحيالىق داۆيد سكلەنيچكا، رۋدولف چەرۆەنى، كانادالىق ەنتوني كامارا، امەريكالىق دجوزەف لابەيت، شۆەتسيالىق پونتۋس وبەرگ سىندى حوككەيشىلەر كوماندا قۇرامىنان كەتتى.
ولاردىڭ ءوزىنىڭ شەبەرلىك دەڭگەيى بيىلعى ويىنشىلاردان جوعارى ەدى.
«مەنىڭ ويىمشا، ەندىگى كەزەكتە ويىنشىلار سەلەكتسياسىنا ءمان بەرىلۋى ءتيىس. كومانداعا كەلۋگە ۇسىنىلعان حوككەيشىلەردىڭ بۇدان بۇرىنعى ناتيجەسىنە كوڭىل بولگەنىمىز ارتىق ەمەس. بيىلعى كەلگەندەر جەرگىلىكتى تۇلەكتەردەن ارتىق ويناي المايتىنى كەزدەسۋ بارىسىندا اڭعارىلىپ ءجۇر. ەندەشە، مۇنداي جونسىزدىككە جول بەرمەگەنىمىز دۇرىس»، - دەيدى جانكۇيەر قايرات ناجماتوۆ.
ارينە، بىلتىر جانكۇيەرلەردىڭ كانادالىق قاقپاشىنىڭ ويىنىنا كوڭىلى تولعان جوق. ماڭىزدى ماتچتىڭ كوبىسىندە ورەسكەل قاتەلىكتەرگە بوي الدىردى. سالدارىنان «بارىس» قارسىلاس ۇجىمدارعا ەسە جىبەرىپ، تۋرنير كەستەسىندە تومەنگى ورىننىڭ ءبىرىن مىسە تۇتتى.
ەندى قۇرلىقتىق حوككەي ليگاسىنداعى كوماندالار 2024 -جىلدىڭ 3-قىركۇيەگى مەن 2025 -جىلدىڭ 31-مامىرى ارالىعىندا سايىسقا تۇسەدى.
جىلداعى داستۇرمەن تۇراقتى كەزەڭدە العاشقى 16-ورىنعا يە بولعان ۇجىمدار گاگارين كۋبوگىندا سايىسقا تۇسۋگە مۇمكىندىك الادى.
اۆتور
ءادىلجان ۇمبەت
