بارسەلونا «رەالدى» ۇتىپ، قىرۋار پايدا كوردى

استانا. قازاقپارات - «بارسەلونا» كلۋبى 11-مامىردا وتكەن يسپانيا چەمپيوناتىنىڭ 35-تۋرىنداعى «رەال مادريدكە» قارسى ماتچتان بيلەت ساتىلىمى ارقىلى رەكورد دەڭگەيدە تابىس تاپتى.

RAC1 راديوسىنىڭ مالىمەتىنشە، ەل-كلاسيكو كۇنى «بارسەلونا» 13,5 ميلليون ەۋرو تابىسقا كەنەلگەن. بۇعان برونداۋ الىمدارىن ەسەپتەمەگەندە، ەڭ ارزان بيلەت قۇنى 219 ەۋرو بولعانى دا اسەر ەتكەن.

ودان بولەك ماتچتى 50319 جانكۇيەر تاماشالاپ، بۇل كورسەتكىش وسى ماۋسىمداعى ابسوليۋت رەكورد كورسەتكىش رەتىندە تىركەلدى. بۇعان دەيىنگى ەڭ جوعارى كورسەتكىشتەر چەمپيوندار ليگاسىنداعى «ينتەرگە» (50314) جانە «باۆارياعا» (50312) قارسى كەزدەسۋلەردە بولعان.

ويىن ناتيجەسى بويىنشا «بارسەلونا» 4:3 ەسەبىمەن جەڭىسكە جەتتى. وسىلايشا كاتالوندىقتار «ەل-كلاسيكوداعى» 104-جەڭىسىن تىركەدى. «رەالدىڭ» ەنشىسىندە - 105 جەڭىس، ال 52 ويىن تەڭ اياقتالعان. بيىلعى ماۋسىمدا بۇل ەكى ۇجىم ءتورت رەت كەزدەسىپ، ءتورت ويىندا دا «بارسا» جەڭىسكە جەتتى.

وسى جەڭىستىڭ ارقاسىندا «بارسەلونا» 82 ۇپايمەن تۋرنيرلىك كەستەنىڭ ءبىرىنشى ساتىسىندا ءوز ورنىن نىعايتتى.