بارلىق وڭىرلەر ءبىلىم كۇنىن 1-قىركۇيەكتە اتاپ وتەدى
استانا. KAZINFORM - ءبىلىم كۇنىنە ارنالعان سالتاناتتى ءىس-شارا ەلىمىزدىڭ بارلىق وڭىرلەرىندە ءداستۇرلى تۇردە 1-قىركۇيەكتە وتەدى. بۇل تۋرالى وقۋ-اعارتۋ مينيسترلىگىنىڭ باسپا ءسوز حاتشىسى - رەسمي وكىلى مەرەكە امانگەلدى قىزى حابارلادى.
2024-2025-جاڭا وقۋ جىلىندا 345 مىڭ ءبىرىنشى سىنىپ وقۋشىسى العاش رەت مەكتەپ پارتاسىنا وتىرادى. ولار ءۇشىن 1-قىركۇيەكتە «مەكتەبىم - مەيىرىم مەكەنى» تاقىرىبىندا سالتاناتتى شارا وتەدى.
«2-قىركۇيەكتە - جاڭا وقۋ جىلىنىڭ ءبىرىنشى كۇنى - «مەنىڭ وتانىم – قازاقستان» تاقىرىبىندا ءبىرىڭعاي سىنىپ ساعاتىمەن باستالىپ، ءارى قاراي ساباق كەستەسىنە سايكەس جالعاسادى.
پەداگوگتەردىڭ ەڭبەگىنە اقى تولەۋگە قاتىستى قازاقستان رەسپۋبليكاسى ەڭبەك كودەكسىنىڭ 79-بابىنا سايكەس جۇمىس بەرۋشى قىزمەتكەردىڭ ناقتى جۇمىس ىستەگەن جانە جۇمىس ىستەمەگەن ۋاقىتىنىڭ ەسەبىن جۇرگىزۋگە مىندەتتى ەكەنىن حابارلايمىز»، - دەپ مالىمدەدى مينيسترلىكتىڭ رەسمي وكىلى.
دەرەككە قاراعاندا، دەمالىس جانە مەرەكە كۇندەرى جۇمىس ىستەگەن قىزمەتكەردىڭ قالاۋى بويىنشا باسقا دەمالىس كۇنى بەرىلەدى نەمەسە قىزمەتكەردىڭ كۇندىك (ساعاتتىق) مولشەرلەمەسى بويىنشا كەمىندە ەكى ەسە مولشەردە اقى تولەنەدى.
