بارلىق رەفەرەندۋم ۋچاسكەسىندە داۋىس بەرۋ اياقتالدى

استانا. KAZINFORM - بارلىق رەفەرەندۋم ۋچاسكەسىندە داۋىس بەرۋ اياقتالدى. بۇل تۋرالى ورتالىق رەفەرەندۋم كوميسسياسى ءتوراعاسىنىڭ ورىنباسارى كونستانتين پەتروۆ ايتتى.

«قازاقستان رەسپۋبليكاسىنداعى بارلىق رەفەرەندۋم ۋچاسكەسىندە داۋىس بەرۋ اياقتالدى. ۋچاسكەلىك كوميسسيا داۋىستاردى ساناۋعا كىرىستى. قولدانىستاعى زاڭناماعا سايكەس، رەفەرەندۋم ۋچاسكەلەرىندەگى داۋىستاردى ساناۋ ۋاقىتى داۋىستاردى ساناۋ باستالعان ساتتەن 12 ساعاتتان اسپاۋى ءتيىس. اۋماقتىق كوميسسيالار ەرتەڭ تاڭەرتەڭ ورتالىق رەفەرەندۋم كوميسسياسىن بايلانىستىڭ ەلەكتروندى ارنالارى ارقىلى داۋىس بەرۋدىڭ الدىن الا قورىتىندىسى مەن ساناق ناتيجەسىن حابارلايدى»، - دەدى كونستانتين پەتروۆ.

ەسكە سالايىق، بۇگىن قازاقستاندىقتار اتوم ەلەكتر ستانتسياسىن سالۋ ماسەلەسى بويىنشا جالپىۇلتتىق رەفەرەندۋمدا داۋىس بەرىپ جاتىر.

رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى:

- ءسىز قازاقستاندا اتوم ەلەكتر ستانتسياسىن سالۋعا كەلىسەسىز بە ؟

داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى:

- «ءيا، كەلىسەمىن» نەمەسە، «جوق، كەلىسپەيمىن».

1-شىلدەدەگى جاعداي بويىنشا ەل كولەمىندە 12176968 ادام رەفەرەندۋمدا داۋىس بەرۋگە حاقىلى.

ايتا كەتەيىك، 20:00 دەگى جاعداي بويىنشا 7820918 ازامات بيۋللەتەن الدى. بۇل تىزىمگە ەنگىزىلگەن ازاماتتاردىڭ 63,87 پايىزىن قۇرايدى.