باركولدەن شىعىپ، جىبەك جولىن بويلاعان تۇيە كەرۋەنى گانسۋگە جەتتى - شەتەلدەگى قازاق باسپا ءسوزى
Kazinform حاا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
يراندا جاڭا ءىرى گاز كەن ورنى اشىلدى - «Eurasia Today» اقپارات اگەنتتى
يراننىڭ فارس پروۆينسياسىنىڭ وڭتۇستىگىندە ورنالاسقان پازان كەن ورنىندا ايتارلىقتاي گاز جانە مۇناي قورى اشىلدى، دەپ حابارلايدى قىرعىزستاندا شىعاتىن «Eurasia Today» اقپارات اگەنتتىگى.
«Eurasia Today» حابارلاۋى بويىنشا، بۇل تۋرالى يراننىڭ مۇناي ءمينيسترى موھسەن پاكنەجاد جاريا ەتتى.
موھسەن پاكنەجادتىڭ مالىمەتىنشە، فارس پروۆينتسياسىنىڭ وڭتۇستىگىندەگى پازان كەن ورنى ايماعىندا جانە بۋشەر پروۆينتسياسىنىڭ سولتۇستىگىنە دەيىنگى اۋماقتا جۇرگىزىلگەن بارلاۋ جۇمىستارىنىڭ ناتيجەسىندە جاڭا قورلار انىقتالعان.
«Eurasia Today» اقپارات اگەنتتىنىڭ دەرەگىنشە، گاز قورى 10 تريلليون تەكشە فۋتتى (شامامەن 283 ميلليارد تەكشە مەتر) قۇرايتىن بۇل كەن ورنى الداعى جىلدارى ەلدىڭ ەنەرگيا تاپشىلىعىن وتەۋدە ماڭىزدى ءرول اتقارا الادى.
ايتا كەتۋ كەرەك، بۇل جولعى جۇرگىزىلگەن بارلاۋ جۇمىستارى يراننىڭ جالپى دالەلدەنگەن گاز قورىن 10 تريلليون كۋب فۋتقا ارتتىردى.
قىتاي لوكوموتيۆتەرى قازاقستانعا ەكسپورتتالدى- «حالىق گازەتى»
27-قىركۇيەكتە شىڭجاڭنىڭ تەمەنگۋان قالاسىندا ورنالاسقان Xinjiang Tiancheng Agricultural Machinery Manufacturing كومپانياسىنىڭ ينتەللەكتۋالدى بيداي ۇرىعىن سەبەتىن 15 ماشيناسى تەكسەرىستەن وتكىزىلىپ، جۇكتەلىپ، قازاقستانعا ءساتتى جونەلتىلدى.
بۇل كومپانيانىڭ بيىلعى اۋىل شارۋاشىلىعى تەحنيكاسى مەن جابدىقتارىن ورتالىق ازيا ەلدەرىنە ەكىنشى رەت ەكسپورتتاۋى.
بۇل تۋرالى وسى اپتادا قىتايدىڭ «حالىق گازەتى» باسىلىمى حابارلادى.
قىتايلىق ب ا ق-تىڭ مالىمەتىنشە، بۇل جولى ەكسپورتتالاتىن ينتەللەكتۋالدى ۇرىق سەبۋ ماشيناسى اۆتوماتتى تۇردە باسقارۋ، ۇرىقتى سەبۋ تەرەڭدىگىن اۆتوماتتى تەڭشەۋ، ولاردىڭ ارالىعىن يكەمدى رەتتەۋ، اۋىسپالى تىڭايتقىشتى ءبىر ۋاقىتتا سەبۋدى اياقتاي الادى. اسىرەسە ورتالىق ازياداعى قۇرعاقشىلىق پەن جارتىلاي قۇرعاقشىلىق كليماتىنىڭ توپىراق سيپاتتامالارىنا بەيىمدەلگەن. وسىنىڭ ارقاسىندا بيداي سەبۋ تيىمدىلىگىن %30 دان استامعا ارتتىرىپ، جەرگىلىكتى شارۋالاردىڭ شىعىندارىن ازايتۋعا جانە استىق ونىمدىلىگىن قامتاماسىز ەتۋگە ەداۋىر كومەكتەسەدى.
سونىمەن قاتار وسى اپتادا «حالىق گازەتى» باسىلىمىندا «گانسۋدىڭ گاوتاي اۋدانىنا جىبەك جولىن بويلاعان تۇيە كەرۋەنى كەلدى» دەگەن اقپارات جارىق كوردى.
اتالعان ب ا ق-تىڭ دەرەگىنشە، 2025 -جىلدىڭ 9-قازانىندا شينجاڭنىڭ باركول قازاق اۆتونوميالى اۋدانىنان جولعا شىققان 33 تۇيە مەن 20 دان استام توپ مۇشەلەرىنەن تۇراتىن شىعىس تيانشان «جىبەك جولى مادەني تۋرىنىڭ» تۇيە كەرۋەنى 49 كۇندىك ساپارىنان كەيىن گانسۋ ولكەسىنىڭ گاوتاي اۋدانى ىشىندەگى جىبەك جولىنداعى ەجەلگى حان جانە تان مادەني جۇرتىنىڭ تۇيە قالاسى ورنىنا كەلىپ جەتتى.
اتالعان ب ا ق-تىڭ مالىمەتىنشە، سەرۋەندەپ جۇرگەن تۇيە كەرۋەنىن قالا تۇرعىندارى مەن تۋريستەرى قاۋمالاپ، ىستىق ىقىلاسپەن تاماشالادى.
ورتالىق ازيا ەلدەرىنىڭ پەداگوگتەرى نوكىستە باس قوستى – ءوز ا
نوكىس قالاسىندا حالىقارالىق دەڭگەيدەگى ماڭىزدى شارا - «ورتالىق ازيا پەداگوگتەرى» فورۋمى باستالدى.
ايماق ەلدەرىنىڭ ءبىلىم بەرۋ سالاسىنىڭ وكىلدەرى، مۇعالىمدەر، حالىقارالىق سەرىكتەستەر مەن بەدەلدى ساراپشىلار باس قوسقان جيىن «ورتالىق ازيا مۇعالىمدەرى - ءبىر ايماق، ءبىر ءۇن، ءبىر كۇش» دەگەن ايشىقتى ۇران اياسىندا وتۋدە، دەپ حابارلايدى «ءوز ا» اقپارات اگەنتتىگى.
حابارلامادا ايتىلعانداي، فورۋمدا زاماناۋي وقىتۋ تەحنولوگيالارى مەن يننوۆاتسيالىق ادىستەردى ەنگىزۋ، تسيفرلىق ءبىلىم بەرۋدىڭ جاڭا مۇمكىندىكتەرى، ەكولوگيالىق تاربيە مەن قورشاعان ورتانى قورعاۋ، سونداي- اق تۇراقتى دامۋ باعىتتارى كەڭىنەن تالقىلانۋدا. مۇعالىمدەر قاۋىمىنا ورتاق وي مەن تاجىريبە الماسۋ الاڭى بولعان بۇل جيىن، كەلەشەك ءبىلىم جۇيەسىنىڭ جاڭا باعدارلارىن ايقىنداۋعا سەپ بولماق.
ايتا كەتەيىك، فورۋمنىڭ العاشقى كۇنى قوناقتار تاحتاكوپىر اۋدانىنداعى «قارا تەران» تۋريستىك ورتالىعىنا ارنايى ساپار شەكتى. مۇندا مادەني- اعارتۋشىلىق شارالار، تانىمدىق سەمينارلار ۇيىمداستىرىلىپ، قاتىسۋشىلار قاراقالپاق ۇلتتىق ونەرىنىڭ اسەم ۇلگىلەرىمەن، ءداستۇرلى تاعام كورمەلەرى جانە ەتنوگرافيالىق قويىلىمدارمەن تانىستى.
سونداي-اق وسى اپتادا «ءوز ا»-دا «حيۋادا «كىلەمدەر شۋاعى» حالىقارالىق كىلەم كورمەسى وتەدى» دەگەن تاقىرىپتاعى اقپارات جاريالاندى.
اتالعان باسىلىمنىڭ دەرەگىنشە، حورەزم ءوڭىرىنىڭ تاماشا مەكەنى سانالاتىن حيۋا قالاسىندا 18- 19-قازان كۇندەرى «كىلەمدەر شۋاعى» حالىقارالىق كىلەم كورمەسى وتەدى.
قازىرگى ۋاقىتتا وسىناۋ كورمەگە قىزۋ دايىندىق جۇمىستارى جۇرگىزىلۋدە. اتالعان كورمە تەك قانا رەسپۋبليكا شەڭبەرىندە ەمەس، الەمگە ايگىلى كىلەم توقيتىن مەكتەپتەردىڭ وكىلدەرىن دە ءبىر الاڭعا توعىستىرماق.
ءىس-شارا وتەتىن ورىنداردا ارنايى پاۆيلوندار، كورمە زالدارى جانە شەبەرلەر ءۇشىن شىعارماشىلىق شەبەرحانالار ۇيىمداستىرىلۋدا. ءتۇرلى ينتەراكتيۆتى باعدارلامالار، شەبەرلىك ساباقتارى مەن تاجىريبەلىك كونفەرەنسيالارعا دايىندىق جۇرگىزىلىپ جاتىر.
قازاقستان يرانمەن بىرلەسكەن بيزنەس جوبالارىن قۇپتايدى - ParsToday
قازاقستاننىڭ يرانداعى ەلشىسى قازاقستان يرانمەن ەكونوميكالىق ىنتىماقتاستىقتىڭ كەڭەيۋىن، بىرلەسكەن اۋىل شارۋاشىلىعى جانە ونەركاسىپتىك جوبالاردى دامىتۋدى جانە تۋريستىك قۋاتتار مەن زاماناۋي تەحنولوگيالاردى پايدالانۋدى قۇپتايتىنىن ايتتى.
بۇل تۋرالى وسى اپتادا ParsToday اقپارات اگەنتتىگى حابارلادى.
يراندىق ب ا ق-تىڭ حابارلاۋىنشا، قازاقستاننىڭ تەھرانداعى ەلشىسى وڭتالاپ وڭالبايەۆ سەنبى كۇنى لورەستان وبلىسى مەن قازاقستان اراسىنداعى ىسكەرلىك كەزدەسۋگە قاتىسقان. اتالعان باسقوسۋدا و. وڭالبايەۆ قازاقستاندا اۋىلشارۋاشىلىق جانە تاماق ونەركاسىبىندەگى 650-دەن استام بەلسەندى كومپانيا تىركەلگەن جانە يراندىق كومپانيالار وسى مۇمكىندىكتى پايدالانىپ، ساۋدا ىنتىماقتاستىعى مەن بىرلەسكەن ينۆەستيتسيانى دامىتۋ ءۇشىن پايدالانا الاتىنىن تىلگە تيەك ەتكەن.
ول وسى ساپار ءۇشىن جاسالعان ۇيلەستىرۋدى جوعارى دەڭگەيدە ەكەنىن ايتا وتىرىپ، يران مەن قازاقستاننىڭ ساياسي قارىم-قاتىناستارىن وڭ باعالاعان. ونىڭ سوزىنشە، ەكى ەل تەك ساياسي دەڭگەيدە ىنتىماقتاسادى، سونىمەن قاتار ولاردىڭ ورتاق تاريحي جانە وركەنيەتتىك تامىرى ولاردىڭ ەكونوميكالىق جانە مادەني قارىم-قاتىناستارىنىڭ دامۋىنا جول اشادى.
جەر سىلكىنىسىنەن كەيىن جابىلعان يراك-تۇركيا قۇبىرىنان مۇناي تاسىمالى قايتا باستالدى - TRT
تۇركيا ەنەرگەتيكا جانە تابيعي رەسۋرستار ءمينيسترى 2023 -جىلعى 6-اقپاندا تۇركيانىڭ وڭتۇستىگىندە بولعان جەر سىلكىنىسىنەن كەيىن جابىلعان قۇبىر ارقىلى اعىننىڭ قايتا باستالعانىن راستادى.
بۇل تۋرالى تۇركيا راديو تەلەۆيزيا پورتالى حابارلادى.
اتالعان ب ا ق-تىڭ كەلتىرگەن مالىمەتتەرىنە سۇيەنسەك، تۇركيا ەنەرگەتيكا جانە تابيعي رەسۋرستار ءمينيسترى الپارسلان بايراكتار «يراك- تۇركيا مۇناي قۇبىرى ارقىلى مۇناي تاسىمالى سەنبى كۇنى جەرگىلىكتى ۋاقىت بويىنشا تاڭعى 7:07-دە (0407GMT) قايتا باستالعان.
ءمينيستردىڭ ايتۋىنشا، قۇبىر 2023 -جىلدىڭ 6-اقپانىنداعى جەر سىلكىنىستەرىنەن كەيىن توقتاتىلعان بولاتىن، ال تۇركيانىڭ مەملەكەتتىك قۇبىر وپەراتورى «BOTAŞ» ونى قازان ايىندا قايتا ىسكە قوسۋعا دايىندادى. بۇل تۋرالى مينيستر بايراكتار «Nsosyal» الەۋمەتتىك جەلىسىنە جازعان.
يراكتىڭ رەسمي جاڭالىقتار اگەنتتىگى «INA» سەنبى كۇنى يراكتىڭ سولتۇستىگىندەگى كۇرد ايماقتىق ۇكىمەتىنىڭ مۇناي كەن ورىندارىنان مۇناي ەكسپورتى قايتا باستالعانىن مالىمدەگەن.
اۆتور
بەيسەن سۇلتان ۇلى
