بانگلادەش ارمياسى شەيح حاسيناعا باعىنۋدان جانە نارازىلىقتى باسۋدان باس تارتتى

استانا. KAZINFORM - بانگلادەشتىڭ بۇرىنعى پرەمەر- ءمينيسترى شەيح حاسينا جاپپاي نارازىلىقتار كەزىندە ەلدەن كەتىپ بارا جاتقان ءتۇنى ونىڭ ارمياسىنىڭ باسشىسى گەنەرالدارىمەن كەزدەسىپ، اسكەرلەر كومەندانتتىق ساعاتتى ورىنداۋ ءۇشىن بەيبىت تۇرعىندارعا وق اتپايدى دەپ شەشتى، دەپ جازادى Reuters.

Reuters اگەنتتىگىنىڭ حابارلاۋىنشا، ەل ارمياسىنىڭ گەنەرالى ۆاكەر- ۋز- زامان حاسينانىڭ كەڭسەسىنە حابارلاسىپ، پرەمەر- مينيسترگە ونىڭ ساربازدارى كومەندانتتىق ساعات تالاپتارىن ورىندامايتىنىن حابارلادى.

جەكسەنبى كۇنى جالپىۇلتتىق قاقتىعىستاردا كەم دەگەندە 91 ادام قازا تاۋىپ، جۇزدەگەن ادام جاراقات العان سوڭ، ەلدە كومەندانتتىق ساعات ەنگىزىلدى. بۇل شىلدەدە حاسيناعا قارسى ستۋدەنتتەر نارازىلىعى باستالعاننان بەرگى ەڭ قايعىلى كۇن بولىپ سانالادى.

حاسينا بانگلادەشتى 20 جىل باسقاردى. ول مىڭداعان وپپوزيتسيا جەتەكشىلەرى مەن جۇمىسشىلارى قاماۋعا الىنعاننان كەيىن قاڭتاردا 170 ميلليون حالقى بار ەلدى باسقارۋ ءۇشىن ءتورتىنشى مەرزىمگە سايلاندى. بۇل سايلاۋعا ونىڭ نەگىزگى وپپوزيتسياسى بويكوت جاريالادى.

ەستەرىڭىزگە سالا كەتەيىك، بۇعان دەيىن بانگلادەش پرەمەر- ءمينيسترى نارازىلىق اكسيالارى كەزىندە وتستاۆكاعا بەرىپ، ەلدەن كەتىپ قالعانىن جازعان بولاتىنبىز.

كەيىنىرەك حاسينانىڭ ۇلى بريتانيادان باسپانا سۇراعانى بەلگىلى بولدى.

5-تامىزدا ەلدە ۋاقىتشا ۇكىمەت قۇرىلىپ، پارلامەنت تاراتىلدى. ءبىر كۇننەن كەيىن نوبەل سىيلىعىنىڭ لاۋرەاتى پروفەسسور مۇحاممەد يۋنۋس ۋاقىتشا ۇكىمەتتى باس كەڭەسشى رەتىندە باسقارۋعا كەلىستى.

قازاقستان رەسپۋبليكاسىنىڭ سىرتقى ىستەر مينيسترلىگى ق ر ازاماتتارىنا اتالعان ەلگە احۋال تۇراقتانعانعا دەيىن بارۋدان ۋاقىتشا باس تارتۋدى ۇسىندى.

اۆتور

ەركەجان سماعۇلوۆا